2 pasdek, nainaguraran iti aldaw a panagsapata opisial ti Cabugao

CABUGAO, Ilocos Sur – Dua a kabarbaro a pasdek ti nainaguraran kalpasan ti panagsapata dagiti nabutosan nga opisial ditoy nga ili nga indauluan da Mayor Edgardo S. Cobangbang, Jr. ken ti baro a bise mayorna a ni Deogracias Jose Victorino Savellano idi Hunio 30.

Binayabay ni Cobangbang  da Vice Governor Deogracias Victor Savellano ken Board Member Jeremias Singson ken da Governor Ryan Singson ken Congressman Ronald Singson iti Umuna a Distrito ti Ilocos Sur, a nanggetteng iti laso kas paset ti pannakainagurar  ti Municipal Conference Building ken ti Local and National Agencies Building.

Ni Fr. Amador Cabaluna ti nangbendision iti dua a pasdek nga inimatangan dagiti agtuturay ti ili, barangay officials, department heads, dagiti empleado ken dagiti residente.

Sakbayna, nagsapata iti daytoy nga aldaw dagiti nabutosan a kabarbaro nga opisial ti ili nga indauluan ni Cobangbang ken  Savellano, ken dagiti konsehal a pakairamanan da Danilo Q. Gazmen; Vicky S. Serna; Dodjie S. Santella;  Jayhan Charisma A. Tan;   Benedicto M. Savellano; Jemaima S. Tan Yee;  Josefina S. Vallejo ken  Carlito S. Pano.

Nagsapata ni Cobangbang iti sanguanan ti amana, ni Edgardo Cobangbang, Sr., barangay captain iti Sabang nga inimatangan ni Jerlie Seguban-Cobangbang , dagiti annakna ken kakabagianna.

Nagsapata met ni Deogracias Jose Victorino Savellano kas bise mayor babaen iti amana, ni Vice Governor Deogracias Victor Savellano. Ni Dina Bonnavie-Savellano ti nangiggem iti Biblia a nangipatayan ti baro a bise mayor iti dakulapna bayat ti panagsapatana.

Inulit ni Cobangbang ti nagyaman kadagiti kailianna gapu iti panangipaayda kenkuana iti talek ken ayat iti napalabas nga eleksion.

Impatalged met ni Vice Mayor Savellano a salimetmetanna ti talek nga inted kenkuana dagiti umili.

“Saan a maysa a DJ ti mangdadael iti dayaw ti Savellano iti Cabugao,” kinuna pay ti bise mayor.

Daytoy ti maikadua a termino ni Cobangbang idinto a damo ni Savellano ti agtakem a bise mayor.#