BANNER: 2 peke nga optometrist, natiliw agek-eksamen iti mata

STA. LUCIA, Ilocos Sur – Dua a peke nga optometrista ti inimbitaran dagiti polis iti police station kalpasan a naireklamoda nga agisaysayangkat iti eksaminasion ti mata kadagiti residente iti Barangay Lubong ditoy nga ili idi Mayo 27.

Kalpasan a nakaawatda iti report idi agarup 11:45 ti nadakamat nga aldaw nga adda peke a doktor ti mata nga agek-eksamen dagiti addaan problema iti panagkita iti Barangay Lubong, nagresponde dagiti polis tapno agimbestigada.

Idi makasangpetda iti nasao a barangay, nagpabigbig kadakuada da Dr. Shiela Granada y Estrada, presidente iti Optometric Association of the Philippines, Ilocos Sur-Abra Chapter ken Dr. Mario Roberto Ablang Granada, maysa met laeng nga optometrist, sada intudo ti dua a babbai a nasukalanda nga agisaysayangkat iti illegal a serbisio ti mata, kas iti panageksamen iti mata ken panagkolekta iti kuarta kas bayad dagiti inorder dagiti lumugar nga anteohos.

Nainaganan dagiti suspek a da Marcela Reyes Advincula, 52, naasawaan ken residente iti 351 Purok 4, Putting Kahoy Silang Cavite ken Thelma Makinanu y Lee, 25, nangiyam-ammo iti bagina a maysa a sales assistant ti ARG Optical Clinique, balasang ken residente iti Baisa Quezon City.

Naala iti ikut dagiti dua ti 17 a resibo a nalabelan iti ARG Optical Clinique a nakaikabilan ti adres nga AC Galgana Building, 12 Marcel Drive Tandang Sora Corner Sangandaan, Novaliches, Quezon City, dadduma a dokumento a naikabil iti maysa a bag ken P1,300.00 a kuarta a mapapati a pinagbayad dagiti klienteda malaksid laeng dagiti optical devices a pakaibilangan ti 6 a men’s frame, 27 a women’s frame, maysa a set ti trial case ken lenses, Snellen Chart, ken sales summary report.

Bayat ti pannakapalutpot dagiti suspek iti police station, simmangpet ti maysa a Rosalie Villena y Dulay, 47, naasawaan, ken residente iti San Jose Del Monte, Bulacan, ket inyam-ammona ti bagina nga empleada iti ARG Optical Clinic ken superbisor ken hepe dagiti personnel ti ARG Optical Clinique a nasukalan nga agek-eksamen iti mata iti ili ti Sta. Lucia sana imbaga nga awan ti sinalungasing dagitoy a paglintegan.

Narekobre pay iti ikut dagiti suspek ti maysa a surat a nangkiddaw ken ni Barangay Captain Janet O. Rabara ti Barangay Lubong, Sta. Lucia a pinirmaan ti maysa a Dr. Connie DC Galgana, ARG Optical Clinique Chief Doctor nga addaan iti License No. 8980 nga ag-operate iti Barangay Lubong.

Ngem awan ti naipakita dagiti suspek a permit manipud iti munisipio para iti operasionda iti nasao a barangay.

Naipan da Advincula ken Makinanu iti Sta. Lucia police station para iti umisu a disposision.

Adda metten iti babaen ti kustodia dagiti polis dagiti nakumpiska nga items agraman ti kuarta.

Iti kaudian a report, naipilan ti kaso a panagsalungasing iti RA 8050 maikontra ken ni Reyes a nasukalan nga agrukrukod iti mata dagiti kliente a residente iti Barangay Lubong bayat ti panagkolekta ni Makinanu iti kuarta a bayad dagiti anteohos.#