SANTIAGO, Ilocos Sur – Dua a tattao ti nagbalin a biktima ti nagsina a pammaltog nga insayangkat dagiti riding in tandem iti Santiago ken Cabugao a nakatayan ti maysa.
Napasamak ti pammaltog iti Santiago iti provincial road a sakup ti Barangay Caburao idi agarup 7:15 ti rabii ti Septiembre 22 a nakagandatan ti biag ti maysa a managan Judy La Pena y Quiabang, 40, naasawaan, negosiante nga aggatgatang ken aglaklako iti motor vehicles ken residente iti Barangay Salincub.
Iti inisial a panagimbestiga dagiti polis, agdaldaliasat ti biktima nga agpaamianan a nakalugan iti motorsiklona idi inabay dagiti umip-ipus kenkuana nga armado a tattao a nakalugan met iti motorsiklo ket pinaltogan ti backrider ti biktima iti sumagmamano a beses.
Nagsagrap ti biktima kadagiti sugat iti tianna ken makannigid a luppona ket dagus a naitaray dagiti immarayat nga umili iti Candon General Hospital, Candon City para iti pannakaagasna.
Naglibas dagiti di nabigbig a suspek iti saan nga ammo a direksion.
Nangiwayat dagiti polis-Santiago iti Oplan Lambat ken nakikoordinarda kadagiti kabangibangda a police station ngem negatibo ti resultana.
Iti panagpalutpot ti SOCO team manipud iti Candon Crime Laboratory Office, nakarekobreda iti maysa a kapsula ken maysa a deformed slug iti crime scene.
Saan pay nga ammo ti mo-tibo ti pannakagandat ti biag ni La Pena.
Kabayatanna, saanen a naidanon a sibibiag iti ospital ni Eduardo Cariaga y Aquino, 54, naasawaan, ken residente iti Barangay Rizal, Cabugao, Ilocos Sur, kalpasan a pinaltogan dagiti armado a tattao a nakalugan iti motorsiklo sadiay Barangay Bonifacioi, Cabugao idi agarup 6:10 ti sardam idi Septiembre 23.
Nakatugaw ti biktima iti sango ti kaserana iti dayta a sardam idi pinaltogan dagiti di nabigbig a suspek.
Naitaray ni Cariaga iti Pira Clinic and Hospital ngem indeklara ti doktor a nang-taming kenkuana a dead on arrival gapu kadagiti sinag-rapna a gunshot wounds iti nadumaduma a paset ti bagina.
Mapapati a cal. 45 ti naramat a paltog kas maibatay dagiti nakolekta dagiti inbestigador nga uppat a kapsula iti nakapasamakan ti krimen.
Naglibas dagiti suspek iti abagatan a direksion a nakalugan met laeng iti motorsikloda.
Segun iti polis, nairaman ti biktima iti listaan ti kapolisan a drug personality iti barangay.
Daytoy ti kitkitaen ti polis nga anggulo iti pannakapapatay ni Cariaga.#
