2 plantasion ti marihuana, naraut; 138,000 kapuon, naparut, napuoran

CERVANTES, Ilocos Sur – Dua a plantasion ti marihuana ti rinaut dagiti nagtitipon nga elemento ti kapolisan ket pinarutda dagiti rinibribu a kapuon daytoy maiparparit a mula sadiay Barangay Dinwede West, ditoy nga ili idi Mayo 10.

Babaen ti direkta a superbision ni Police Senior Supt. Nestor Eswagen Felix, OIC, Ilocos Sur Provincial Police Office, indauluan da Supt. Elpidio Nartates ken Supt. Edwin Col-ong Balles dagiti joint elements ti Cervantes PS, PDEA, PIB, PAIDSOTG, ken PPSC a nangiyimplementar iti COPLAN Code Name Green Gold 2 partikular ti nadakamat a barangay a nagresulta iti pannakaparut ken pannakapuor dagiti 138,000 a kapuon ti fully grown a marihuana a mapattapatta nga agbalor iti P28,600,000.00.

Immuna a rinaut dagiti polis ti plantasion sadiay Barangay Dinwede West, Cervantes idi agarup 6:35 ti agsapa ket pinarutda dagiti 48,000 kapuon a marihuana a naimula iti 3,000 metro kuadrado a bangkag a mapattapatta nga agbalor iti P9,600,000.00.

Agdagup 90,000 a fully grown a kapuon ti marihuana ti pinarut met laeng ti nasao a grupo iti maikadua a plantasion sadiay Sitio Inpao-et, Barangay Dinwede West, Cervantes nga aglawa iti 5,000 metro kuadrado.

Mapattapatta nga agbalor dagiti naparut a maiparparit a mula iti P18,000,000.00.

Posible a nasaep dagiti agtartaraken kadagiti kapuon ti marihuana ti iraraut dagiti polis ket nagtakiasda.

Pinuoran dagiti polis dagiti naparut a kapuon ti marihuana iti mismo a plantasion ket nangibabada laeng iti sumagmamano a bungkos a naipan iti PPO.#