2 plantasion ti marihuana, rinaut dagiti polis operatiba

BANTAY, Ilocos Sur – Ginasut a ribu a pinuon ti marihuana ken bunubon nga agpateg iti nasurok a sangagasut a milion a pisos ti pinag-ot ken pinuoran dagiti nagtitipon nga operatiba iti insayangkatda nga operasion iti  nagbeddengan ti Benguet ken Sugpon idi agsapa ti Oktubre 9.

Iti report manipud iti provincial police office ditoy nga ili, rinaut dagiti nagtitipon nga elemento ti PAIDSOTG, ISPPSC, PDEA RO 1, Sugpon ken Alilem police nga indauluan ni Police Chief Inspector Greg Tuzon Guerrero babaen ti direkta a superbision ni Provincial Director Police Senior Supt. Eduardo A. Dopale, ti dua a nagsina a plantasion ti marihuana nga aglawa iti 20,000 square meters a masarakan iti Mt. Kenbetngaw, nagbeddengan ti Barangay Kayapa, Bakun, Benguet ken Sitio Nagawa, Barangay Caoayan, Sugpon, Ilocos Sur idi agarup alas 6:00 ti agsapa iti Oktubre 9, 2010 ket pinag-otda sada pinuoran ti aganay 350,000 a fully grown a marihuana ken 40,000 a seedlings.

Mapattapatta nga agbalor dagitoy iti P106 milion. Awan ti natiliw nga agbambantay iti nasao a plantasion.

Nangibaba dagiti operating troops iti sumagmamano kabungkos a pinuon ti marihuana a naipan iti Ilocos Sur PPP, Camp Pres. Elpidio Quirino, Barangay Bulag ditoy nga ili kas ebidensia.

Kabayatanna, maysa a lalaki ti natiliw iti buy bust operation nga insayangkat dagiti polis iti Barangay Barbarit, Magsingal, Ilocos Sur idi agsapa ti Oktubre 10, 2010.

Naaresto ni Ernesto Garcia Jr., y Salvatiera, 18, baro, residente iti Barangay Barbarit ti nasao nga ili babaen dagiti polis Magsingal babaen ti koordinasion ti PDEA/PAIDSSOTG Ilocos Sur nga indauluan ni PSI Arsenio Ramos, COP ti Magsingal.

Maysa a polis ti nagpammarang a kustomer ket nakagatang ken ni Garcia iti marijuana buds a nabungon iti panid ti notebook nga agdagsen iti sumurok kumurang a 18 gramo.

Nakumpiska pay iti ikut ti suspek ti P500 a marked money, ken selpon a naaramat iti transaksion.#

Enhanced by Zemanta