2 polis-La Union, nasab-itan iti Medalya ng Kasanayan

CAMP BGEN OSCAR M FLORENDO – Dua a polis iti La Union ti pinadayawan ti Police Regional Office 1 gapu iti naballigi a pannakaaresto iti most wanted person iti Rehion 1 itay nabiit.

Insab-it ni Region 1 Police Chief Directorial Staff Senior Superintendent Marlou C. Chan ti Medalya ng Kasanayan kada Police Superintendent Eduardo L. Danguecan, hepe ti Provincial Intelligence Branch ti La Union Police Provincial Office (PIB-LUPPO) ken ni Police Officer 2 Marc Carl Q. Julaton iti maysa a seremonia a naangay iti PRO1 grandstand ditoy idi Hunio 16.

Dagiti dua a police officers ti responsible iti pannakaaresto ni  Silvano Tugade Rondal alias Bebot, 43, naasawaan ken residente iti Badoc, Ilocos Norte.

Nakalista ni Rondal a Mostr Wanted Person iti Region 1 ket nakapatong ti gunggona a P250,000.00 para iti pannakatiliwna nga inaprobaran ti  Department of the Interior and Local Government (DILG).

Sumangsango ni Rondal iti 2 counts of murder ken panaglabsing iti Commission on Elections Resolution No. 2323 mainaig iti Section 32 ti RA 7166.

Imetda ti warrant of arrest nga inyisio ni Judge Leo M. Repatalo ti Regional Trial Court (RTC) Branch 54 in Alaminos City, Pangasinan, ken babaen ti koordinasion ti CIDG Ilocos Sur ken ti Badoc Police Station, tiniliw ti arresting team iti panangidaulo ni Danguecan ti suspek iti pagtaenganna iti Barangay Napu, Badoc idi malem ti Enero 2, 2014.

Kinuna ni Region 1 Police Director Chief Superintendent Roman A. Felix, Regional Director ti PRO1, a nagballigi ti pannakaaresto ni Rondal babaen ti kooperasion dagiti sibilian nga impormante.

“Partikular a pagyamanak dagiti umili iti Region 1 gapu iti pannakainbolbarda iti kampania ti PRO1 maikontra kadagiti wanted persons ken iti sapasap a kampania maikontra iti kriminalidad ken dadduma pay a kita ti kinadakes,” kinuna ni Felix.

Naited ti pammadayaw kas maiyalubog iti probiso ti National Police Commission (NAPOLCOM) Memorandum Circular No. 93-018 kas inamendaran ti  Memorandum Circular No. 2006-003 ken intuding ti Republic Act 6975.#