Footer

2 polis, napadayawan a Mamang Pulis ti rehion

CAMP B/GEN. OSCAR M. FLORENDO, San Fernando City – Dua a polis ditoy rehion ti napadayawan a “Mamang Pulis” gapu iti impamatmatda a kinatured ken panangibayogda iti saguday ti “Mamang Pulis” a  mapangnamnamaan.

Pinadayawan ni P/Chief Supt. Romeo C. Hilomen, regional director ditoy, da PO1 Luis N. Bigay ken SPO1 Hannibal Brillantes bayat ti PNP Talakayan sa Isyung Pulis (TSIP) a naangay ditoy itay nabiit.

Agawiden ni Bigay, naka-assigned iti Special Operations Group iti Pangasinan Police Provincial Office.  kalpasan ti duty-na iti alas 8:30 ti rabii idi Marso 7 idi hinold-ap ni Roderick Fernandez ti naglugananda a dyipni.

Impaturong ni Fernandez ti paltogna kadagiti pasahero, indeklarana ti hold-ap sana ginammatan ti selpon ni Shirley Dela Peña ken ti bag ni Rona Semilla.

Inyam-ammo ni Bigay ti bagina a polis idinto nga imbilinna ti panangisubli ti suspetsa dagiti inagawna.

Timmapuak ketdi ni Fernandez sa naglugan iti motorsiklo a sumursurot iti dyipni.

Bimmaba ni Bigay tapno kumamat ngem nagpaputok ti suspetsa ket kapilitan a nakipinnaltog ti polis a nagtungpal iti nakaro a pannakasugat ni Fernandez ken ti kaduana.

Iti biang ni Brillantes, nakadestino iti San Juan Police Station, La Union, intarayna ti maysa a pasiente iti ospital iti tengnga ti rabii.

Kinuna ni Hilomen a namnamaenna nga agbalin a napateg a pagtuladan ti naited a pammigbig kadagiti polis tapno ituloyda ken ipatungpalda ti sinapataanda a pagrebbengan a napnuan dedikasion ken iti amin a kabaelanda.

Innayon ni Hilomen a babaen ti pammadayaw, agbalin koma a paratignay kadagiti taona “tapno itakderda dagiti kalidadda a kas “Mamang Pulis”, managbuteng iti Dios, makatao, presentable, nalaka a maasitgan ken mapagnamnamaan iti amin a tiempo.” (Danny Antalan)