Footer

2 riding in tandem, ginandatda a takawan paggasolinaan

CABUGAO, Ilocos Sur – Tallo nga aldaw kalpasan ti pannakapasamakna, sumangsango pay laeng dagiti polis ditoy iti blangko a pader mainaig iti kinasiasino dagiti nagisayangkat iti napaay a panaghold-ap iti maysa a paggasolinaan iti Barangay Rizal ditoy nga ili idi malem ti Enero 26.

Kinuna ni PChief Inspector William Nerona, hepe ti polis ditoy, a nagiwayatda iti follow-up investigation mainaig iti nasao a panaghold-ap ngem awan ti nakailasin kadagiti suspek.

Kinuna ti hepe ti polis a nakaabungot ti rupa ti suspek a simrek iti uneg ti opisina ti paggasolinaan ket saan a nailasin ti gasoline boy agsi-pud ta napaay a nangrabsut iti abungot daytoy.

Uray ti kadua ti mannanakaw a nagbati iti ruar kas lookout ket saan a nailasin agsipud ta naka-shades, nakaabungot iti panio ken nakaaruat iti sweat shirt nga adda hoodna.

Awan ti naitaray dagiti suspek a kuarta agsipud iti pannakirupak ti gasoline boy a ni Christian Baclig y Del Rosario, 18, baro, ken residente iti Barangay Pug-os, ditoy nga ili.

Naammuan ti Tawid News nga adda koleksion ti gasolinaan a P33,000.00 idi ginandat a takawan dagiti dua a suspek.

Segun iti inisial nga inbestigasion, nagsardeng ti maysa a TMX Honda 155, nalabaga, awanan plaka, iti sango ti Caltex Gasoline Station  ket maysa kadagiti suspek ti nagsaludsod ken ni Baclig no adda lakona a krudo.

Kellaat, inasut ti maysa a suspek ti paltogna sana in-deklara ti “Holidap ito, huwag kang papalag.”

Ngem idinto a mapabutngan, nakirupak ni Baclig ket iti panaginnagawda iti suspek iti paltog, pimmutok daytoy a nakapuntaan ti safety glass ti  makindaya a paset ti opisina. Mapapati a natnag ti magasin ti paltog ngem adda nabati a bala iti chamber ti paltog ket  pimmutok manen daytoy a nakapuntaan ti  ridaw ti opisina.

Dinisnog ni Baclig ti suspek ket nagtaray daytoy iti yan ti kaduana a kuyogna ti paltogna, sada naglibas babaen ti motorsikloda.

Nagsagrap ni Baclig iti bassit a sugat iti makannawan a dakulapna ket naipan iti Pira Clinic and Hospital para iti pannakaagasna.

Kinuna ni Nerona nga apaman a naawatda ti report mainaig iti panagtakaw, nagrespondeda a sigida ngem saandan a nakamatan dagiti suspek nupay nagkatlo ti grupoda a nangisayangkat iti pursuit operation.

Nakarekobre dagiti inbestigador iti dua nga empty shell, maysa a magasin a nagkarga iti lima a bala ti cal .45 iti nakapasamakan ti krimen.

Iti umuna a dua a lawas ti Enero daytoy a tawen, dua a pagtaengan iti Barangay Imus, Santiago ken Barangay Paing, Bantay, Ilocos Sur  ti nagsaruno a sinerrek dagiti armado a mannanakaw ket kinurimesda ti kuarta, alahas ken selpon dagiti bumalay a maysa a balikbayan manipud iti United Kingdom ken maysa a retirado a mangisursuro.

Agdagup iti P145,900 a kuarta ken P207,500.00 dagiti assorted nga alahas ti kinasakas dagiti mannanakaw iti balay ni  Lucena Orenzo y Cortez, 64, naasawaan, retirado a nurse, ken balikbayan manipud iti United Kingdom, idi Enero 14 idinto a maysa nga aldaw sakbayna, 400 Euro currency nga agbalor iti P30,000 ken assorted nga alahas nga agpateg iti P100,000, Ipod, Netbook Laptop, 6 a selpon ken IDs ti natakaw iti balay ni  Severino Corpuz y Etrata, 63, naasawaan, retirado a public school teacher.

Maysa kadagiti mannanakaw ti nabigbig babaen ti ladawanna iti rogues’ gallery ket napilaanen iti kaso.

Positibo a binigbig ni Lucena Orenzo y Cortez, 64, naasawaan, retirado a nurse ken balikbayan manipud iti United Kingdom,  ni Jonathan Cabradilla, tubo ti Poblacion, Bauko, Mountain Province a  maysa kadagiti simrek iti pagtaenganna.

Birbiroken dagiti polis dagiti kakaduana iti Mountain Province a mapapati a nagpainganda kalpasan ti panagtakaw.#