2 rifle grenades, naisuko

SAN JUAN, Ilocos Sur – Dua a rifle grenades ti insuko dagiti tallo nga aggatgatang iti scrap materials iti police station ditoy idi aldaw ti Agosto 24.

Insuko da Janet Piano y Palattao, 40, naasawaan, residente iti Barangay Bannuar; Jomalyn Villaspir y Palattao, 37, naasawaan, ken residente iti Barangay Lapting; ken Jackson Corpuz y dela Cruz, 28, naasawaan, ken residente met iti Barangay Immayos Norte, agpapada nga scrap collectors.

Iti panagimbestiga dagiti polis, napan naggatang dagiti tallo iti Santa, Ilocos Sur iti scrap materials ket idi lumabasda iti maysa a waig, nakasarakda iti dua a plastic tubes.

Impan dagiti scrap collectors dagiti tubo iti maysa a junkshop iti igid ti highway ti Barangay Immayos Norte ket ditoy a naduktalanda dagiti rifle grenades.

Naipaima dagiti rifle grenades iti polis ditoy a nangipan met iti EOD, Ilocos Sur PPO para iti umisu a disposision.#