2 shoplifters, nabuking nga agipuslit kinurimesda a tagilako

VIGAN CITY – Nabuking ti dua a babai a mangipuslit koma kadagiti kinurimesda a tagilako iti nagsina a gandat a panagtakaw iti dua a pagtagilakuan ditoy siudad itay nabiit.

Nabuking ni Amy Managuit y Moreno, 45, naasawaan, ken residente iti Otel Road, Calasiao, Pangasinan a nagpanggep a mangipuslit kadagiti kinurimesna a tagilako gapu ta nagsuspetsa ti guardiagapu iti nabungkong a pammagina.

Idi rinikisa ti guardia ni Managuit, nasukainanna dagiti assorted a ready to wear nga aruaten iti bagi daytoy a pakaibilangan ti lima a t-shirt, 4 a shortpant, 2 a male support nga agpateg amin iti P2,524.00.

Natiliw pay ti kamera ti closed circuit television ti panangisakibot ti suspek kadagiti tagilako.

Iti pannakaisurat daytoy, maisagsaganan ti kaso a theft maikontra iti suspek.

Kabayatanna, nabuking met ni Fe Marie Valencia y Raquel, 29, awanan asawa ken residente iti Barangay Bantaoay, San Vicente, Ilocos Sur gapu ta nagguni ti detector idi ipuslitna koma ti short pant a kinurimesna iti Penshoppe a masarakan iti Plaza Maestro ditoy met laeng Vigan City.

Nupay impetteng ni Valencia a nalipatanna a naikargana ti short pant iti awitna a plastic bag, segun iti report manipud iti polis, nasukainan ti nasao a tagilako iti siketna.

Segun iti report, simrek ni Valencia iti pagtagilakuan ket nagpammarang a kustomer sa mapapati nga insakibotna iti siketna ti short pant.

Ngem saan met a naikkat ti button a naikapet iti tagilako isu a nagguni ti detector idi rummuar koman ti suspek iti ridaw ti pagtagilakuan.

Kinuna ni Valencia a gatangenna koma ti short pant nga agpateg iti P499.00 ngem idi madamag no mano ti kuartana, naammuan a nasurok laeng a P200.00.#