CABUGAO, Ilocos Sur – Dua a simbaan ditoy ti ikkan iti pondo ti gunglo dagiti annak daytoy nga ili nga addan iti ballasiw taaw.
Impalgak ti Cabugao Association of Northern California (CANCA) a maikkan iti pondo a saan a nababbaba ngem P1 milion ti St. Mark the Evangelist Church ken saan a nababbaba ngem P500,000.00 iti United Church of Christ of the Philippines.
Naammuan nga agtaud ti pondo manipud iti napastrek iti global reunion a naisayangkat iti Sta. Clara, California idi Hulio 20-22.
Kabayatanna, nagyaman ni Mayor Edgar S. Cobangbang, Jr. kadagiti nadumaduma a gunglo dagiti taga-Cabugao nga addan iti ballasiw-taaw gapu iti dakkel a maitultulongda ditoy nga ili.
Dinakamat ni Cobangbang ti Cabugao Association of Northern California (CANCA), Cabugao Association of Southern California (COSCA), Cabugao Sons and Daughters of Hawaii ken dadduma pay a gunglo a nangted iti pondo para kadagiti streetlights, pannakaipatakder ti lying-in clinic, ken dadduma pay a proyekto ti gobierno munisipal nga idadauluanna.#