2 suspek iti pammaltog, birbiroken dagiti polis

VIGAN CITY – Addan suspek dagiti polis iti pannakapaltog ti maysa a tricycle driver iti asideg ti pasdek ti maysa a cable television iti Barangay 9 ditoy siudad idi parbangon ti Agosto 30.

Kinuna ti polis nga addan dua a suspekda a nangisayangkat iti pammaltog ken ni Joshua Parfali y Cuade, agpaspasada iti traysikel a residente iti Barangay VI ditoy siudad.

Nainaganan dagiti suspek iti pammaltog a da Jun Jun Dayao, taga-Capangpangan, Vigan City, ken John Paul Arce, taga-Barangay IX, ditoy met laeng siudad.

Napaltogan ni Parfali, 21, baro, tricycle driver, ken residente iti Barangay VI iti asideg ti pasdek ti Vigan Satellite TV Inc. a masarakan iti Abaya Street idi agarup 12:10 ti parbangon ti nadakamat a petsa.

Kagapgapu a nagginom iti Embassit Bar da Parfali ken dagiti kakaduana a nabigbig a da John Abon y Ribuyaco ken Ferdinand Artates y Ramos ket aggawiddan idi mapaltogan ti biktima.

Ni Dayao ti mapapati a gunman idinto a ni Arce ti nagmaneho iti motorsiklo idi insayangkatda ti pammaltog.

Iti pannakaisurat daytoy, di pay nabirokan dagiti polis dagiti suspek a naglibas a nakalugan iti motorsiklo kalpasan nga insayangkatda ti pammaltog.

Kabayatanna, naammuan ken ni Remedios Farpali, manangen ti biktima, a nakalasaten iti peggad ti kabsatna kalpasan ti operasionna iti Gabriela Silang General Hospital.

Segun ken ni Remedios  nalasaten ti kabsatna ti peggad ngem maobserba pay ti sugatna iti paset ti kimmotna agsipud ta mapapati nga adda nasagid ti bala a tulang.

Kinuna ni Remedios nga uppat da Parfali a rimmuar iti dayta a rabii ket nakakotseda a napan nagginom iti Embassit Bar ngem immuna a pimmanaw ti maysa ta napanna insubli ti kotse isu a nagnagnan dagiti tallo idi aggawidda.

Iti inisial a panagimbestiga dagiti polis, mapapati nga adda di panagkinnaawatan da Parfali dagiti suspek bayat ti panaginomda iti bar.

Nupay kasta, naanawa dagiti dua  a grupo.

Segun iti polis, idi rimmuar dagiti tallo iti bar, mapapati a sinurot ida dagiti suspek a naglugan iti motorsiklo ket idi addadan iti Abaya Street,  pinaltogan ti maysa kadagiti suspek ti biktima  a nagsagrapan daytoy iti dunor iti bukot, luppo ken iti tian.

Nakasarak dagiti inbestigador iti uppat a kapsula a nagtaud iti cal .45 iti nakapasamakan ti krimen.

Nangiwayat dagiti nagresponde a polis iti pursuit operation ngem saanda a nabirokan dagiti suspek.#