2 suspek iti panagtakaw, saandan a makasuan

VIGAN CITY – Sabali pay a kaso ti panagtakaw ti pakaupayan ti kapolisan ditoy siudad agsipud ta saan manen a dimmanon iti korte kalpasan nga imbatad ti natakawan a saanen nga interesado nga agipila iti kaso maikontra kadagiti suspek.

Iti report manipud iti polis ditoy, naammuan a saanen nga interesado ni Nixon Pajaro y Blanco, 40, naasawaan, residente iti Barangay Beddeng ditoy siudad nga agipila iti kaso maikontra kada Edwin Acedo y Robiego, residente iti Barangay Sabang, Cabugao, Ilocos Sur ken Nelson Aganad y Robles, residente iti Barangay Turod, Cabugao, Ilocos Sur.

Dagiti dua ti suspetsa iti panagtakaw iti pagtaengan ni Pajaro idi Oktubre 14 a nakapukawan ti maysa a laptop HP (widescreen) ken petaka ti biktima a naglaon iti Canadian citizenship ID ken P1,000.

Iti maysa nga interbiona iti media, linagidaw ni COP Police Supt. Elpidio Nartates ti saan a pannakaisaklang iti korte dagiti natiliwanda a nagtakaw agsipud ta napukawen ti interes dagiti natakawan nga agipila iti darum kalpasan a napasublida ti natakaw kadakuada.#