BANNER NEWS. 2 suspek iti pannakapapatay ti mayor ti Infanta, natiliw iti beach resort

CAMP BGEN OSCAR M FLORENDO, San Fernando City, La Union –  Adda met laengen pagdur-asan ti inbestigasion iti pannakapapatay ti mayor ti Infanta, Pangasinan iti pannakatiliw ti dua a suspek iti maysa a beach resort sadiay Dasol iti dayta met la a probinsia idi Disiembre 15.

Innaganan ni Senior Supt. Mariano Luis M. Verzosa Jr., dati nga OIC Provincial Director of Pangasinan, ken commander ti Special Investigation Task Group (SITG) “Martinez” dagiti dua a suspek a maysa a Ricardo R. Legarda, 47, naasawaan, plumber; ken Richard Manuel, 32, naasawaan, agpada a residente iti GMA, Cavite.

Natiliw dagiti dua a suspek idi pumanawda koman iti maysa a beach resort sadiay Dasol, Pangasinan a nakalugan iti dua a motorsiklo nga awanan iti plate number.

Mapapati a nakatsek-in dagiti dua iti Pobletin Beach Resort, Barangay Macalang, Dasol idi Disiembre 15, 2012.

Positibo a binigbig dagiti saksi dagiti dua a nangpapatay ken ni Infanta Mayor Ruperto Martinez idi malem ti Disiembre 15.

Napaltogan ni Martinez iti uneg ti balayna sadiay Barangay Cato, Infanta, Pangasinan ket nagsagrap ti mayor iti tallo a sugat iti barukongna ken iti tengngedna a mapapati a nagtaud iti cal. 45 ket naideklara nga awanen ti biagna idi maidanon iti Sta. Cruz Hospital a nakaitarayanna kalpasan ti pannakapaltogna.

Binukel ni Police Chief Superintendent Franklin Jesus B. Bucayu, Police Regional Office 1 Director, ti Special Investigation Task Group (SITG) “Martinez” tapno mangisayangkat iti panagimbestiga mainaig iti nasao a pammapatay  ket nadesignaran ni Verzosa a commander.

Politika ti maysa nga anggulo a kitkitaen dagiti inbestigador a motibo ti pammapatay agsipud ta mapapati a kandidato manen daytoy a para bise mayor iti eleksion inton Mayo 2013.

Naipila ti complaint a murder maikontra kadagiti suspek ket nai-docket kas CC B-810 iti Regional Trial Court Branch 70, Burgos, Pangasinan iti sala ni Judge Maria Ellen Aguilar.

Kabayatanna, impakaammo ni Bucayu a narelibo ni Verzosa kas OIC provincial director ti Pangasinan ket mai-reassigned iti Police National Headquarters iti Camp Crame.

Kinuna ni Bucayu a maiyalis ni Verzosa agsipud ta agpailayon ti anakna a ni Maria Andrea Verzosa-Meneses a para konsehal iti Lingayen.

Segun ken ni Bucayu, polisia ti PNP ti mangpreserba iti non-partisanship dagiti police officials iti masungad nga eleksion.

Nadesignaran ni Senior Supt. Manolito C. Labador, deputy regional direction for operations ti Police Regional Office 1 (PRO1), kas OIC ti Pangasinan Police Provincial Office ket nagtugaw iti puestona idi Disiembre 21.#