2 suspek pannakapaltog ti dean ti College of Law, natiliw iti pursuit operation

BATAC, Ilocos Norte – Dua a suspek iti pannakapaltog ti dean ti College of Law ti Mariano Marcos State University ditoy ti natiliw iti dragnet operation nga insayangkat dagiti polis kalpasan ti pammaltog.

Natiliw iti Pinili, Ilocos Norte da Reynaldo Pagatpatan, 32, CAFGU member, ken residente iti Barangay Ugis, Nueva Era, Ilocos Norte, ken ti kaduana a ni Jonas Quesada, 24, residente met laeng iti nadakamat a lugar, babaen ti dragnet operation nga inwayat dagiti polis kalpasan ti panangpaltogda ken ni Atty. Ramon Leaño, dean ti College of Law ti MMSU.

Segun iti report, kalkalpas ti klase ni Leaño ket aglugan koma iti sasakayanna iti parkingan idi inasitgan dagiti suspek sada pinaltogan.

Intaray dagiti estudiantena ti biktima iti Mariano Marcos Memorial Hospital and Medical Center para iti pannakataming dagiti sugat a sinagrapna.

Narekobre dagiti polis ti motorsiklo nga inaramat dagiti suspek a getaway vehicle kalpasan ti panangpaltogda ken ni Leaño ken mapapati a nakumpiskada iti ikut dagitoy ti maysa a cal. 45, maysa a shotgun, 2 a selpon, ken ti bag ti biktima a naglaon iti P20,000.00, dokumento, class cards ken dadduma pay a ramit.

Madama ti panagpalutpot dagiti inbestigador no adda pakainaigan ni Jimmy Bautista, guardia ti unibersidad, iti pammaltog gapu ta mapapati a kinateks dagiti suspek daytoy sakbay ti pammaltog.

Pinaglibakan ni Bautista nga am-ammona dagiti suspek ngem inakona a nakitkitana ni Pagatpatan sadiay Badoc nga ilina.

Iti pannakaisurat daytoy, adda pay la ti biktima iti ospital. Nupay kasta, segun iti report, addan iti nasayaat a kasasaad.

Kitkitaen dagiti inbestigador no ania ti motibo ti pannakapaltog ni Leaño.#