Footer

2 suspetsa iti Bersamin slay, natiliw iti Rizal

CORDILLERA AUTONOMOUS REGION – Sangasako a bagas ti nangitunda iti pannakatiliw ti dua a suspetsa iti pannakapapatay ti diputado ti Abra.

Segun ken ni Cordillera Administrative Region (CAR) regional director, Police Sr. Supt. Martin, sinursurotda ti sangasako a bagas manipud iti Sta. Cruz, Ilocos Sur agingga a naidiskarga iti Cubao sa manen naikarga iti maysa a dyip nga agbibiahe iti Baras, Rizal a nagtungpal iti pannakatuntonda iti naglemmengan da Freddie Dupo ken Sonny Taculao, dua a kangrunaan a suspetsa iti pannakapapatay ni Abra Congressman Luis Bersamin, Jr.

Inaresto ti nagtipon a bunggoy ti kapolisan ditoy ken ti Laguna police ni Dupo iti Barangay Paenan, Baras, Rizal iti agsapa ti Oktubre 21, maysa nga aldaw kalpasan ti pannakaaresto ni Sonny Taculao, sumagmamano a kilometro ti kaadayona iti nakatiliwan ti immuna.

Ni Dupo ti mapapati a nangtangdan ken ni Taculao nga agwanawan bayat ti panangisayangkatna iti pammapatay.

Napaltogan ni Bersamin a puon ti nakatayanna iti arubayan ti Mt. Carmel Church iti Quezon City idi Disiembre 16, 2006. Nairaman a natay iti pammaltog ti seguridadna a polis.

Kinuna ni Martin a sumagmamano a bulan a nagsiput dagiti operatives iti babaenna iti maysa a barangay iti Sta. Cruz, Ilocos Sur a patienda a nagpaknian da Dupo agsipud ta adda kakabagianda iti dayta a lugar.

Kinunana a naduktalanda babaen ti maysa nga asset a mangipatpatulod dagiti kabagian ni Dupo iti sangasako a bagas iti maysa a barangay iti Rizal.

Sililimed a sinurot dagiti operatiba no sadino ti nakaipatulodan ti bagas agingga a natuntonanda ti naglemmengan dagiti suspetsa.

Babaen ti koordinasion dagiti polis ti Rizal, immuna a natiliwda ni Taculao.

Segun met ken ni Rizal provincial director, Police Senior Supt. Freddie Panen, kalpasan ti pannakaaresto ni Taculao, nagiwarasda iti retrato ni Dupo ken nangitanggayada iti P500 a gunggona iti makaitudo iti naglemmenganna.

Kinuna ni Panen a saanda a narigatan a nangkemmeg ken ni Dupo agsipud ta daytoy laeng ti kabarbaro a rupa iti Paenan, maysa a naseksek a barangay ti Baras.

Kinuna dagiti inbestigador nga iti pannakatiliw dagiti dua, maammuanda metten no asino ti nagmandar iti pannakapapatay ni Bersamin.#