2 tattao, natiliw iti drug operation

VIGAN CITY – Dua a tattao ti inaresto ti kapolisan iti naasaruno a drug operation a naiwayat sadiay Santiago ken ditoy siudad itay lawasna.

Idi agarup 7:45 ti sardam ti Nobiembre 19, nangiwayat ti nagtipon nga elemento ti Vigan City Police Station, PDEA ISSET ken Ilocos Sur PAIDSOTG iti buy bust operation iti Jose Singson Street, Barangay VIII, Vigan City a nagtungpal iti pannakaaresto ni Francis Argallon y Pinzon, 35, naasawaan, ken residente iti Barangay Purok a Bassit, Vigan City.

Nagpammarang poseur buyer ni SPO1 Joel S. Javier a kinuyog ti maysa a civilian asset ket nakagatang iti maysa a heat sealed transparent plastic sachet a mapapati a naglaon iti shabu babaen iti marked money a P500.00.

Nakakumpiska pay dagiti polis iti maysa a lighter, getteng, improvised glass tooter, ken improvised glass tooter iti ikut ti suspek.

Naiyendorson ti kaso a panaglabsing iti Section 5, 11, 12 ken 15 ti RA 9165 maikontra ken ni Argallon iti Office of the City Prosecutor, Vigan City.

Kabayatanna, positibo ti insayangkat ti kapolisan a panagsukisok iti balay ni Melvin Cuaresma y Andres, naasawaan, sadiay Barangay Olo-olo Norte, Santiago, Ilocos Sur idi agarup 8:10 ti rabii ti Nobiembre 20.

Nakakumpiska iti balay ni Cuaresma dagiti nagtitipon nga elemento ti Santiago police station babaen ti koordinasion ti ISPAIDSOTG and PDEA RO1 iti 5 plastic heat sealed sachet a naglaon iti mapapati a shabu, 4 plastic sachet a maar-aramat a pagrepake, maysa a bassit a narolio nga aluminum foil ken maysa nga improvised bamboo clip a maar-aramat met a pagrepake iti shabu.

Mapapati a naglibas ti suspek idi masukisok ti balayna ngem simmuko met laeng kadagiti barangay officials a nangipaima kenkuana kadagiti polis kalpasanna..

Sinaksian dagiti opisial ti barangay ken kameng ti media ti naisayangkat a panagsukisok.

Naipan dagiti nakumpiska nga items iti Santiago police station para iti dokumentasion ken disposision.#