2 tawenna nga ubing, nalmes iti irigasion

BANTAY, Ilocos Sur – Naliwayan ti ina ti anakna bayat ti panaglabana ket idi agbalaw, nalmes gayamen daytoy iti irigasion sadiay Sitio Fontanilla, Barangay Paing, ditoy nga ili.

Segun iti report, idi agarup alas 7:00 ti bigat ti Mayo 10, nagay-ayam da Areel Peruna, 6, Arleigh Peruna y Beronia, 2, ken dadduma pay nga ubbing iti likudan ti balayda, bayat ti panaglaba ni Melda Peruna y Beronia nga inada.

Iti agarup alas 9:00, nadlaw ni Melda nga awan ti anakna ket idi dina mabirokan, nagpatulong kadagiti kaarrubada nga agbirok sana tineksan ni lakayna nga aggawid ta mapukpukaw ti anakda.

Kalpasan ti maysa nga oras a panagbirbirokda, nasarakanda ti ubing a nalmes iti irigasion iti Barangay Taguiporo, sumagmamano a metro ti kaadayona manipud iti balayda.

Segun ken ni Areel, nakitana ti kabsatna a nagpaamianan nga agturong iti irigasion nga asideg iti balayda ngem dina naipakaammo iti inana.#