STA. MARIA, Ilocos Sur – Dua a tattao ti natay iti nagsina nga aksidente ditoy nga ili.
Natay da Rolando Bello, 29, residente ti Ampuagan ken ni Renato Castro, 44, residente iti Suso, agpada a barangay ditoy gapu iti sugat a sinagrapda kadagiti nasao nga aksidente.
Segun iti report, pinadas ni Bello a nakalugan iti Dio a motorsiklo a labsan ti Mercedez Benz a minaneho ni Downies Dato, 29, ngem nasapgidna ti likud ti van a nakaigapuan ti pannakakautna iti bangir a linia ti kalsada. Apagisu met a sumungad ti Isuzu Elf Truck a minaneho ni Santos Cortez, residente iti Villa Hermosa, Santa Cruz, Ilocos Sur ket nagdinnungpar dagiti dua a lugan.
Naitaray ti biktima iti Reyes Clinic and Hospital ngem naideklara a dead on arrival.
Kabayatanna, aksidente a nasapgid ti Fariñas Trans a minaneho ni Jimmy Luen, residente iti Bacsil, Laoag City, ni Renato Castro bayat ti panagtakderna iti igid ti kalsada, kaabayna ti bisikletana.
Gapu iti sugat a linak-amna, natay nga insigida ti biktima.
Boluntario a simmuko ti drayber iti Santiago-PNP.