2 tricycle drivers, nagriri gapu iti pasahero

VIGAN CITY – Dua nga agpaspasada iti traysikel iti parkingan iti nagsulian ti Quirino Boulevard ken Rivero Street, Barangay 9 ditoy siudad ti nagsubang gapu iti pasahero.

Nagramut ti riri idi mapapati a saan a kayat ni Allan Bello y Tabali, 37, naasawaan, nga ilugan ti maymaysa a pasahero ket impasana ken ni Jervick Guese y Dela Cruz, 28, naasawaan.

Bayat ti panagririda, mapapati a nanggammat ni Guese iti kayo, impang-orna ken ni Bello sana binekkel daytoy.

Nupay kasta, napagtalna ida dagiti kakaduada sakbay a simmangpet dagiti polis.

Impan dagiti nagresponde a polis ni Bello iti Gabriela Silang General Hospital para iti pannakaagas ti sugatna idinto a kinuyogda ni Guese iti Vigan Health Office para iti mediko-legal nga eksaminasion sa naipan iti Vigan police station.#