2 trike drivers, natiliw nga agsusugal

CANDON CITY – Dua nga agpaspasada iti traysikel ti tiniliw dagiti polis gapu iti panagsusugalda iti Barangay San Isidro ditoy idi rabii ti Oktubre 12.

Inaresto dagiti polis da Orlando Ragma y Ramos, 34, naasawaan; ken Gabriel Lenbantino y Leoncio, 21, baro, agpada a tricycle drivers ken residente iti Barangay Calongboyan ditoy met laeng siudad ket kinumpiskada dagiti kuarta a pakairamanan ti dua a P10, maysa a P5, ken maysa a P1 coin a pusta ken 2 a beinte singko a coins a naaramat a pagbontayog.

Nasalamaan dagiti polis bayat ti panagpatroliada dagiti suspek ken dadduma pay a lallaki nga agsusugal iti cara y cruz iti nagsulian ti kalsada ti Madarang ti nadakamat a barangay ngem nakalibas dagiti dadduma nga agsusugal a nakasiput iti yaasideg dagiti polis.

Naidatag ti complaint a  panaglabsing iti PD 1602 maikontra kadagiti dua iti opisina ti city prosecutor.#