Footer

2 truck nagkarga iti akasia, napasardeng iti checkpoint

NARVACAN, Ilocos Sur – Dua a truck a nagkarga iti kayo a mapapati a napukan nga illegal ti pinasardeng dagiti polis iti national highway sadiay Sitio Limmansangan, Barangay Margaay ditoy nga ili idi malem ti Septiembre 4.

Nangipasdek dagiti polis nga indauluan ni Narvacan COP Police Chief Inspector Joseph Fajardo ken dagiti kameng ti ISCIDG nga impanguluan ni Police Chief Inspector Arbel Mercullo iti checkpoint iti nadakamat a barangay kalpasan a nakaawatda iti impormasion nga adda dua a truck nga agibiahe iti akasia nga illegal a napukan.

Immuna a limmabas ti Mitshubishi Canter truck iti  agarup 5:10 sa simmaruno ti Isuzu Elf truck idi 5:30 ti malem ti nadakamat a petsa.

Idi awan ti maipakita dagiti drayber a permit, naipan dagiti truck agraman dagiti kargada a napukan nga akasia iti police station.

Malaksid dagiti drayber a nainaganan Wilbert Palacpac y Castillo, 42, naasawaan ken residente iti Barangay Balaleng, Bantay, Ilocos Sur; ken Manilito Montero y Tolentino, 32, naasawaan, ken residente iti Barangay Lubong, San Vicente, Ilocos Sur, karaman pay a naipan iti police station dagiti 14 a pahinante dagiti dua a lugan nga agnaed amin iti Barangay Lubong, San Vicente, Ilocos Sur.#