2 ubbing, nalmes iti karayan

SALCEDO, Ilocos Sur – Dua nga ubbing ti naireport a nalmes ditoy nga ili idi Abril 14 ken 16.

Iti naladaw a report manipud iti kapolisan ti Salcedo, nalmes idi Abril 7 ni April Joy Molina y Munar, 3,   bayat ti panagdidigosda ken pito a kakaduana iti Amburayan River.

Sa la inreport ni Marissa  Licuanan, 42, naasawaan, mannalon, residente iti Barangay San Tiburcio, ti pannakalmes ni April Joy idi Abril 14, makalawas kalpasan ti insidente.

Segun iti polis-Salcedo, iti laksid ti pannakaammo ni Marissa, simmurot ni April Joy kadagiti pito a kinaay-ayamna a napan aglalangoy iti karayan.

Nakita laengen dagiti nakikuyogan ti biktima a malmalmes daytoy iti adalem a paset ti karayan ket dagus a nagpaarayatda.

Narekobre ti biktima iti agarup 10:30 ti bigat ket dagus a naitaray iti Salcedo Medicare Hospital ngem indeklara ti doktor a nangtaming kenkuana a dead on arrival.

Kabayatanna,  maysa a walo ti tawenna nga ubing ti nalmes iti Buwaya River idi malem ti Abril 16.

Naireport a nalmes ni Erica Gem Diola y Plangganan, 8, Grade II pupil, ken residente iti Brgy. Bidbiday, Galimuyod, Ilocos Sur.

Naammuan iti panagimbestiga dagiti polis a napan nagpipiknik iti Buwaya River, iti sakup ti Kintanguyab, Bulala, Salcedo, ti ina ti ubing ken sangapulo a kakaduana ket naikuyog ti biktima.

Kalpasan ti pangaldaw, napan naglangoy ti grupo.

Idi aggawid koman ti grupo, nadlawanda a mapukpukaw ti biktima.

Binirokda ti ubing ket narekobre ti maysa a Rey Dampulay ti biktima iti uneg ti danum.

Intarayda ti ubing iti Salcedo District Hospital ngem indeklara ti doktor a nangtaming kenkuana nga awanen ti biagna.#