2 upland town, naikkan ambulansia

QUIRINO, Ilocos Sur – Saggaysa nga ambulansia ti naited iti daytoy a munisipio ken Cervantes, Ilocos Sur idi Disiembre 15.

Naited ti ambulansia babaen ti programa ni Gov. Luis “Chavit” Singson a Community Health Access Vehicle Intended for Barangay Transportation (CHAVIT) bayat ti panagpiesta daytoy nga ili idinto a naited iti daytoy met laeng nga aldaw ti sabali pay nga ambulansia para iti Barangay Comillas South.

Kinuna da Mayor Clifford Patil-ao ken Barangay Captain Arthur Oliseo a napateg ti kaadda ti ambulansia iti lugarda agsipud ta adda usarenda no adda pasiente nga emerhensia nga itarayda iti ospital ken adda napateg a papananda a pakasapulanda iti lugan.

Dagiti 4×4 ti naited nga ambulansia ket kabaelan dagitoy ti dumanon uray iti kangatuan a paset dagiti dua nga ili.#