2,000 nagrali, nagpirma iti manipesto kontra korapsion, political dynasty

VIGAN CITY – Ti dinastia ti politika ti ramut ti naipanurok ken di malapdan a korapsion, ket daytoy koma ti maikkan iti madagdagus ken nainget nga atension, daytoy ti bugas ti manipesto a pinirmaan dagiti nakipaset iti prayer rally a naangay iti Plaza Burgos idi malem ti Septiembre 28.

Kasta met a kinondenar dagiti nagrali ti “pork barrel scam ken amin a sabali a kaarngina a di nasayaat a pannakaaramat  ken panangabuso iti pundo ti publiko” iti probinsia ti Ilocos Sur idinto a nagapelada iti sibubukel a pannakaipakat ti hustisia ken sipupudno a pannakaiserbi ti kangatuan ken natan-ok nga interes dagiti Tattao.

Iti panungad ti manipesto a pinirmaan ti mapattapatta 2,000 a tattao, kinunana a “saan a maisupadi ti naipanurok a korapsion iti Priority Development Assistance Fund, nalatlatak nga ammo kas pork barrel, iti panagtakaw iti buis a nagrigatan a tinegged dagiti tatao”.

“Nakaam-ames a krimen ti kinadagsen daytoy  nakadakdakkel a panangburbor iti pundo agsipud ta naipaidam dagiti kangrunaan a sosial a serbisio a maited koma kadagiti tattao,” innayon ti manipesto.

Kinuna pay ti manipesto a kakaruan nga eskandalo nga itden ti pork barrel scam, gapu ta naaramid wenno naipalubos a naaramid dagiti isu met laeng a tattao wenno isu met laeng nga institusion a mangaywan koma iti kuarta dagiti tattao.

“Ngarud, nakaro a nabastardo ti panagtalek ti publiko iti publiko a puesto,” kinuna ti manipesto.

Inyunay-unay ti manipesto a “napilitkami a manganalisar dagiti naun-uneg a puersa a nakaigapu dagiti agparparang nga arig nasindikatuan a di nasayaat nga aramid ket naduktalanmi a ti dinastia politikal ti sistema ti ramut a nangpataginayon amin dagitoy…”

Kas apela dagiti nagrali, imbatadda ti total a pannakapukaw ti PDAF wenno pork barrel funds a nailatang kadagiti Representante ken Senador ket maited kadagiti nasional nga ahensia dagiti pundo para kangrunaan a sosial a serbisio ken maipadalan kadagiti lokal nga ahensia para iti implementasion.

“Daytoy tapno malapdan ti pannakaibaliw dagiti pundo a political money para iti kabukbukodan nga interes politikal,” kinuna ti manipesto.

Inyunay-unay pay ti manipesto ti masansan a pannakaipubliko ti COA report kadagiti tattao tapno masigurado ti transparensia ken akauntabilidad.

Sakbay ti panagmartsa dagiti nagrali, naibasa ti pastoral statement kontra pork barrel manipud ken ni Arsobispo ti Nueva Segovia Ernesto Salgado.

Naisentro ti nasao nga statement iti pork barrel scam, ti “saan a nainkalintegan a pannakausar ken pannakaaramat ti Priority Development Assistance Fund (PDAF)” a “nagbalin nga instrumento iti political patronage, ken naaramat iti panagkunniber ken korapsion”.

“Adu ti nagtimek a dumawat a maisardeng koman ti pannakaited ti PDAF kadagiti adda iti Kongreso. Pudno a saan nga insigida a mapukaw ti problema ti korapsion uray pay no maikkat ti PDAF. Masapul ti kumpleto a pannakaipakat ti hustisia. Maimbestigaran ti kaso, ket agsupapak dagiti addaan panaglabsing iti linteg. Masapul ti panangusig ken reporma dagiti sistema ken pagalagadan ti gobierno. Masapul a maparut ti sistema ti korapsion. Masapul a mabalbaliwan ti nakillo a kultura ti politko…” kinuna ti statement.#