2,000 PPCRV poll volunteers iti Ilocos Sur, tumulong iti eleksion ita nga aldaw

VIGAN CITY — TUMULONG dagiti 2,000 poll volunteers ti Parish Pastoral Council for Responsible Voting (PPCRV) iti Arkidiosesis ti Nueva Segovia wenno Ilocos Sur iti pannakaangay ti Honest, Orderly and Peaceful Election iti Ilocos Sur ita nga aldaw, Mayo 13, 2019.

Daytoy ti pinasingkedan ni Rev. Fr. Danilo Martinez, Director ti Social Action Commission ti Nueva Segovia, ken Archdiocesan Coordinator ti PPCRV, kabayatan ti pannakiuman kenkuana.

Naamuan a nakasaganan dagiti 2,000 a PPCRV poll volunteers manipud kadagiti 41 a parokia iti Nueva Segovia a makikaysa iti pannakaisayangkat ti eleksion. Naggapu dagiti PPCRV poll volunteers kadagiti 32 nga ili ken dua a siudad iti Ilocos Sur. Immunan a nagsanay dagiti poll volunteers kadagiti lima a bikariato ken sumagmamano a parokia kadagiti annongenda kas kameng ti PPCRV nga accredited citizen’s arm ti Commission on Elections. Naaramid ti orientation ken panagsanay iti Voter’s Education, panagaramat iti Vote Counting Machine ken Pollwatching seminar. 

Mairaman kadagiti annongen dagiti poll volunteers ket tumulong kadagiti botante para iti naannayas a panagbotosda. Maaddaan ti PPCRV voters assistance desk dagiti amin a presinto a tumulong kadagiti botante nga addaan iti problema iti panagbotosda.

Dagiti PPCRV pollwatchers ket mapalubosanda kadagiti pagbotosan a presinto ket addaanda iti karbengan nga agpaliiw ken agipila iti reklamo kadagiti pagteng a maikontra iti Omnibus Election Code, ken mangala iti kopia dagiti official election returns para ti operation quick count. Addaan pay ti karbengan dagiti PPCRV poll volunteers a mangbayabay iti pannakaibiahe ken pannakabilang dagiti election returns kadagiti lugar nga opisial a pakabilangan dagiti botos iti kada ili ken siudad.

Dagiti PPCRV poll volunteers ket nagsanaydan kadagiti kangrunaan nga annongenda agraman iti umno a panagbotos kadagiti balota ken panagusar iti voting counting machines. Nagdalan dagiti PPCRV poll volunteers kadagiti nadumaduma a training nga insayangkat ti COMELEC nga indauluan ni Atty. Marino Salas, Provincial Election Officer. Dagiti naadalda ket imburay met dagiti PPCRV poll volunteers kadagiti padada nga agserbi iti eleksion.

Nakikaysa pay ti PPCRV iti pannakaangay dagiti unity walk, peace covenant ken dadduma pay a gannuat para ti napudno, naurnos ken nakappia nga eleksion iti Ilocos Sur.

Iti mainaig a damag, pinasingkedan ni Brig. Gen. Joel Orduña, baro a Region I Police Director, ken Colonel Adolfo Rafanan, Ilocos Sur Police Provincial Director nga ikagumaan ti PNP a pagtalinaeden a naurnos ken nakappia ti eleksion iti Region I pakairamanan ti Ilocos Sur. Immandarda ti panagbalin ti PNP a neutral and non-partisan, ken ti panagridam ken panagalertoda nga agtignay tapno malapdan ti kinadamsak iti politika.

Agtinnulong ti COMELEC, Department of Interior and Local Government, PNP, 81st Infantry Battalion ti Philippine Army, PPCRV, National Movement for Free Elections ken Legal Network for Truthful Elections para iti Clean, Honest, Accurate, Meaningful and Peaceful elections ita nga aldaw.

Immunan a naisayangkat ti reshuffle dagiti Election Officers ken Chief of Police kadagiti amin nga ili ken siudad iti Ilocos Sur tapno mapasingkedan ti saan a pannakaimpluensia kadakuada dagiti kandidato. Addan dagiti sumagmamano nga ili a maibilang nga “areas of concerns” a nainget a bantayan ti COMELEC ken PNP tapno masaluadan ti nakappia nga eleksion.

Manamnama ti nainget a balubal iti posision ti kina-gobernador iti nagbaetan da Gov. Ryan Singson ken Narvacan Mayor Zuriel Zaragoza, ken kina-bise gobernador iti nagbaetan da Vice Gov. Jeremias Singson ken sigud a Provincial Board Member Atty. Anicka Zaragoza, ken ti salisal iti kina-kongresista iti Umuna a Distrito a pagsalisalan da Cong. Deogracias Victor Savellano ken sigud a Cong. Ronald Singson, ken nainget a risiris dagiti lokal a kandidato kadagiti sumagmamano nga ili pakairamanan dagiti ili ti Narvacan a pagsalisalan da sigud a Mayor Edgardo Zaragoza ken sigud a Gobernador ken agdama a Sangguniang Bayan Member Luis “Chavit” Singson. Masipsiputan met ti salisal iti ili ti Sinait, Cabugao, San Juan, Santa Catalina, Caoayan, Santa, Santa Maria, Tagudin, Burgos, Galimuyod ken dadduma pay nga upland municipalities. Manamnama met ti naannayas ken nakappia nga eleksion kadagiti siudad ken ili nga awan ti kasalisal dagiti kaaduan a kandidato kas iti Vigan City, San Vicente, Bantay, San Ildefonso, Santo Domingo, Magsingal ken dadduma pay nga ili iti Ilocos Sur.  

Iti pannakiuman kadagiti sumagmamano a botante manipud kadagiti nagduduma nga ili iti Ilocos Sur, nagkaykaysada iti tarigagay nga agbalin koma a naan-anay a nadalus ken nakappia ti eleksion iti Ilocos Sur, babaen ti pannakalapped ken pannakadusa dagiti aggatgatang iti botos ken agisaysayangkat ti pamutbuteng. Impakaammoda ti paliiwda a nainsaknapan a pannakaaramat ti kuarta ken panagiwaras iti pasuksok babaen kadagiti politiko ken dagiti pasurotda. Impakaammo pay dagiti nakauman nga umili a karit koma kadagiti adda iti COMELEC, PNP ken PPCRV ti pannakapasardeng dagitoy a naipakadawyanen nga aramid no panawen ti panagpipili tapno maibilang a nadalus ti eleksion iti Ilocos Sur ken iti intero a Pilipinas.