Footer

Bayadan iti prangkisa, serbisio ti traysikelan iti Vigan City, status quo

VIGAN CITY – Pogi points!

Daytoy ti panangsuma ti maysa nga agpalpaliiw iti politika iti saan a panagdur-as ti singasing a maipangato ti franchise ken service fee dagiti traysikelan ditoy siudad. VIGAN CITY – Pogi points!

Daytoy ti panangsuma ti maysa nga agpalpaliiw iti politika iti saan a panagdur-as ti singasing a maipangato ti franchise ken service fee dagiti traysikelan ditoy siudad.


Iti session ti sangguniang panglungsod itay Hulio 3, saan a limsot iti konseho ti singasing ti tallo a konsehal a maipangato ti franchise ken service fee ket masurot pay laeng ti status quo mainaig iti daytoy a bayadan para iti operasion dagiti traysikelan ditoy siudad.

Ngem kinuna ti dina kayat painaganan a political analyst nga annugoten man wenno saan dagiti konsehal, nakaturongen ti imatangda iti panagpipili inton 2007 ket dida kayat a banggaen ti grupo dagiti traysikelan gapu iti kadakkel ti bilangda a mangibayog wenno mangirarem iti kandidaturada iti eleksion.

Iti masungad nga eleksion, manamnama ti panagkandidato manen dagiti nagturpos ti panagtakemda a konsehal idinto a mapattapatta nga adda met plano dagiti kaadduan nga agdama a konsehal nga agpailayon manen.
Pabor da Konsehal Ever Molina ken Konsehal Germelina S. Goulart a manayonan ti singir ti franchise fee iti 100% idinto a 50% met ken ni Konsehal Hermenigildo Apelin.

Iti agdama, P150 ti singir iti prangkisa idinto a P50 iti para iti serbisio.

Ngem sinupiat ti kaadduan dagiti konsehal a pakairamanan da Konsehal Figuerres, Agdamag, Aninag, Adriatico, Formoso, Quibilan ken Alves daytoy a singasing dagiti tallo a kabaddungalanda idinto nga inggunamgunamda ti pannakasurot pay laeng ti status quo iti singir ti prangkisa ken serbisio kadagiti traysikelan nga agpaspasada iti siudad.

Inkalintegan ti sumagmamano a konsehal a no maingato ti franchise ken service, ipasa dagiti traysikelan ti increase kadagiti commuters.

Inyunay-unay met dagiti dadduma a konsehal ti pannakasurot ti napag-aanamongan iti closed-door legislative-executive meeting a pannakaingato ti singir iti prangkisa ken serbisio dagiti traysikelan.

Iti sabali a bangir, iti konsultasion a naangay idi Hunio 15 iti daytoy a tawen a nakaawisan kadagiti tricycle drivers ken operators, impeksada ti isusupiatda a maipangato iti franchise ken service fee.

Ngem kinuna ti nasao a political analyst a saan a kayat dagiti konsehal a mapagura dagiti nadumaduma a gunglo dagiti traysikelan ditoy siudad agsipud iti dakkel a bilangda nga agbutos a mangitunda iti pakaarusan wenno balligi ti asinoman nga agkandidato para konsehal iti eleksion inton 2007.

Iti eleksion idi 2004, nupay ninamnama ti kampo da Goulart a magun-odna ti kangatuan a puesto, nagdapag laeng a maikalima. Maitudo a ti panangidaulona iti committee on transportation ti dakkel a nakagapu iti pannakaarus ni Goulart iti ninamnamana a nangatngato a puesto iti eleksion.

Sakbayna, iti eleksion idi 2001, dandani natnag ni George Villanueva, chair met iti committee on transportation, iti magic 8. Maitudo a napagurana dagiti traysikelan gapu kadagiti inrusatna a gakat mainaig iti transportasion.

Saan met a nailayon ni Ador Barba idi 1998 a para konsehal gapu ta napagurana dagiti traysikelan.

Comments are closed.