Footer

Editorial: Maisakripisio a karnero?

KALPASAN ti naunday a kaulimekna, nangipaulog ti Opisina ti Ombudsman iti resolusion a duktalna nga adda naglabsingan ni Comelec Commissioner Resurreccion Borja ket mabalin nga isaklang ti House of Representatives iti impeachment nga aramatenna dagitoy a duktalna.

Iti unos ti dua ket kagudua a tawen, tinugawan ti Ombudsman nga idadauluan ni Merceditas Gutierrez ti direktiba ti Korte Suprema a mangkita iti kriminal a liabilidad dagiti opisial ti Commission on Elections ken pribado nga umili a nainbolbar iti maanomalia a kontrata ti automated counting machines a maaramat koma iti eleksion idi 2004.

Segun iti Ombudsman, nagkabsiw ni Borja gapu iti panangipalubosna iti Bids and Awards Committees (BACs) a makipartisipar ti Mega-Pacific Consortium iti bidding ken iti pannakaiyawat iti kontrata iti baet saan nga eligible ken adda pagkamtudan a teknikal daytoy.

Winaswas ti Korte Suprema ti kontrata iti nagbaetan ti Comelec ken ti Mega Pacific gapu iti saan a panangitaltalek ti election body dagiti paglintegan ken bukodna a paglintegan ti bidding idi iyawatna ti kontrata iti Mega Pacific para iti automation ti pannakakanbas ken pannakabilang dagiti butos.

Kanayonna, inikkan ti Korte Suprema ti Ombudsman iti pinal a deadline a mangiruar iti konklusion ti panagpalutpotna mainaig iti kriminal a liabilidad dagiti opisial ti Comelec ken dagiti sabsabali pay a nakipartisipar iti transaksion.

Sakbay ti deadline itay Hunio 30, nangiruar ti Ombudsman iti resolusion nga adda liabilidad ni Borja ket mabalin nga aramaten ti Kamara dagiti takuatna no iyussuatna ti impeachment proceedings maikontra ken ni Borja.

Mainaig iti liabilidad dagiti dadduma pay a komisioner, kinuna ti Ombudsman a madama pay ti panagukkonna kadagiti pammaneknek.

Imbilin pay ti Ombudsman ti pannakaikkat dagiti lima a miembro ti Comelec bids and awards committee gapu iti panangitedda iti otorisasion ti pannakagatang dagiti automated counting machines manipud iti Mega Pacific Consortium.

Ita dagiti saludsod:

Apay a ni Borja laeng ti dakkel nga ikan nga itudo ti Ombudsman a masaklangan iti impeachment?

Apay nga iti baet ti kabayagen ti direktiba ti Korte Suprema, di pay naan-anay ti panagimbestiga ti Ombudsman iti kulpabilidad dagiti Comelec officials?

Ken apay nga ipatudon ti Ombudsman iti Kongreso a mangiyussuat iti impeachment maikontra ken ni Borja?

Madakamat ditoy nga inaprobaran ti Comelec babaen ti maysa a resolusion idi Abril 15, 2003 babaen ti panangidaulo ni Chairman Benjamin Abalos ken pakairamanan da retirado a Commissioner Luzviminda Tancangco, Rufino Javier, Falph Lantion ken Mehol Sadain ken agdama a Commissioner Florentino Tuazon, Jr. ti pannakaiyawat ti award ti kontrata iti Mega Pacific para iti pannakagatang dagiti automated counting machines.

Inaramid daytoy ti Comelec en banc sakbay nga impaulog ti BAC ti rekomendasionna.

Makuna ngarud a pangngeddeng daytoy ti sibubukel a Comelec. Ti aramid ti amin, maidissuol laeng iti maymaysa?

Maigapu kadi iti panagparang ni Borja iti Senado mainaig iti hearing iti alegasion ti panagsuitik a nakaikabsiwanna a nagkuna nga adda dagiti naisayangkat a panagsaur iti eleksion idi 2004?

Wenno maysa nga escape goat wenno sacripisial lamb ni Borja a maidaton tapno saan a magargaraw dagiti “nasantuan a baka” iti Comelec ken tapno saan a maluktan ti mangrugin a maikupin a “Hello Garci” tapes?

Nakakadkadlaw pay nga ipatudon ti Ombudsman iti Kamara a mangiyussuat iti impeachment maikontra ken ni Borja agsipud kano ta awan ti hurisdiksion ti opisinada kadagiti impeachable nga opisial kas kadagiti agtuturay iti Comelec.

Ngem saan kadi a sakup ti pagrebbengan ti Ombudsman nga agtignay maikontra kadagiti impeachable officials?

Iti daytoy a tignay ti Ombudsman, tumpaw ti suspetsa nga at-attananna a garawen dagiti “saan a makuti” nga opisial ti Comelec.

Iti sabali a bangir, no maisaklang ni Borja iti impeachment iti Kamara, nangato ti posibilidad a saan nga agdur-as daytoy, kas iti napasamak ken ni Commissioner Tancangco ken ni Pres. Arroyo idi naisaklangda iti Kamara babaen ti impeachment.

Tapno maikkat dagiti suspetsa, rumbeng laeng nga iruar ti Ombudsman ti naan-anay a duktalna tapno masaklangan amin dagiti adda pannakaibiangna iti anomalia ti pannakagatang dagiti automated counting machines ken tapno mapunas dagiti duadua a naipatugaw ni Gutierrez iti Ombudsman gapu iti kinaasidegna ken ni Pres. Arroyo.

Inkari ni Gutierrez idi agtugaw a saksi ti rekordna a nadalus ken naimpusuan ti panagserbina. Ipakitana ngarud ita ti kinatibkerna ken kaawan amakna a mangipakat iti linteg uray asinoman ti mabaddekan, asideg man wenno kaaliado ni Pres. Arroyo.

Comments are closed.