Footer

Motorsiklo, traysikel, nagdungpar 1 natay, 6 nasugatan

VIGAN CITY – Maysa ti natay idinto a nasugsugatan ti innem pay a tattao iti aksidente a napasamak iti maysa a barangay ditoy iti sardam ti Hulio 4.

Natay ni Florante Alberto, 21, baro, residente ti Barangay Bulala ditoy idinto a nasugatan da Joselito Ablog, 19, baro, taga-Bulala; Romy Masinsin, 17, baro, residente ti Aggay, Bantay, Ilocos Sur; Mark Camacho, 35, tricycle driver, residente ti San Pedro, Vigan City, ken dagiti tallo nga annakna.


Segun iti inbestigasion, iti agarup 6:30 iti sardam ti Hulio 4, agturturong ti motorsiklo a minaneho ni Alberto a sakayna da Ablog ken Masinsin iti amianan a direksion idinto nga agpaabagatan a direksion ti traysikel a minaneho ni Camacho ket iti nagkurusan iti Bulala, mapapati a naala ti motorsiklo ti linia ti traysikel a puon ti nagdinnungparanda.

Naitaray dagiti naglugan iti motorsiklo iti Gabriela Silang General Hospital ngem naideklara nga awanen ti biag ni Alberto.
Iti pannakaisurat daytoy, adda pay la iti ospital da Ablog ken Masinsin.

Naitaray met iti Rabara Clinic and Hospital dagiti aggaama a Camacho ngem rimmuarda met laeng kas out-patient ta saan a nakaro ti sugatda.

Nakaro ti dadael dagiti dua a lugan.