Footer

Pagtaengan, nasukisok

NARVACAN, Ilocos Sur – Positibo ti insayangkat dagiti polis a panagsukisok iti maysa a pagtaengan ditoy itay nabiit a nakakumpiskaan kadagiti maiparparit nga agas.

Sinukisok dagiti polis ditoy babaen ti panangidaulo ni PCI Marlo Castillo, chief of police, ti pagtaengan dagiti agassawa nga Alex ken Imelda Cantoria, residente ti barangay Sta. Lucia, ditoy babaen ti bileg ti search warrant No. 129 nga imparuar ti korte.

Pakairamanan kadagiti naala iti nasao a panagsukisok ti maysa a plastic cylinder a naglaon iti mapapati a shabu nga agdagsen iti 1.8 a gramo ken aggatad iti P2,500, uppat a disposable lighter, 2 nga empty plastic sachet, 3 nga aluminum foils, 2 a plastic burners, 1 a sachet a naglaon iti lima a tabletas a mapapati nga ecstacy, 1 a plastic sachet a naglaon iti 10 a tabletas, ken maysa nga improvised straw a maar-aramat iti repacking.

Insigida a naipila ti kaso kadagiti agassawa iti provincial prosecutor office iti Vigan City babaen ti IS number 06-356.

Kinuna ni Castillo a ti pannakapugipog ti illegal a droga ti maysa kadagiti prayoridadna a tamingen bayat ti panagtakemna iti daytoy nga ili.