Footer

Uray Caoayan SB, kontraenna singasing a rebision ti zonal valuation dagiti daga

CAOAYAN, Ilocos Sur – Immuna ti Vigan City.

Ita, sumaruno daytoy nga ili a nangipeksa iti isusupiatna iti singasing ti Bureau of Internal Revenue a pannakaipangato ti baluasion dagiti real properties iti probinsia.


Segun iti maysa a partisipante iti public hearing a naangay iti Baluarte, pagtaengan ni Gov. Luis “Chavit” Singson, itay Hunio 28, umabot iti 100% ti ngatuan ti buis dagiti real properties no masurot ti singasing ti BIR a rebision ti zonal valuation dagiti real properties.

Dimmanonen para iti maikadua a pannakaibasa ti maysa a resolusion a naidatag iti konseho ditoy a mangkontra iti nasao a singasing.

Manamnama a maidatag iti BIR iti las-ud ti 10 nga aldaw ti nasao a resolusion.

Iti dayta met la a public hearing iti Baluarte, indatag ti Konseho ti Vigan City iti BIR ti maysa a resolusion a nangkontraanna iti singasing daytoy nga ahensia ti gobierno a para kolekta iti buis a mangipangato iti baluasion dagiti daga iti daytoy a siudad.

Kinuna ti resolusion a nainget a supiaten ken kontraenna ti naisingasing a maikadua a rebision ti zonal valuation dagiti real properties iti siudad gapu ta “nangato unay ti pannakaipangato ti zonal value dagiti real properties no maikumpara iti fair market value kas tinagipatgan ti Vigan City Assessor ken “saan a maiparbeng ken saan a naitiempo gapu iti nabiit pay a pannakaipangato ti lokal ken nasional a buis.”

Segun iti resolusion, iti umuna a rebision ti zonal value dagiti real properties iti Vigan, “namsek a naipangato manipud iti 11.11% iti 4,900% manipud iti inisial a zonal valuation ket iti daytoy maikadua a rebision, ngumato ti zonal valuation iti 10% agingga iti 20% kas base iti pannakakuenta iti internal revenue taxes.

Ngem inkalintegan ni District Revenue Officer Imelda Bueno a no talaga a surotenda ti prevailing market price dagiti dagdaga iti siudad, nababbaba nga amang tri zonal valuation.

Kinuna ti resolusion nga “agtungpal ti naisingasing a zonal valuation dagiti daga iti Vigan iti ingangato ti presio dagiti mailako a daga iti Siudad ti Vigan a “saan a maiyataday iti nasayaat a klima ti negosio ken mang-taktak iti pannakaiyalis iti panagtagikua iti real pro-perties.”

Kinuna pay ti resolusion a “saan a makaapekto iti dakes ti revenue generation ti nasional government agsipud ta magungun-od ti local a revenue district office ti BIR ti tuntun-oyen ken puntiriana a koleksion.”

Ngem kinuna ni Bueno a dakdakkel ti maal-ala ti Ilocos Sur nga internal revenue allotment (IRA) ngem iti koleksion ti BIR, “ngarud, uray ti Ilocos Sur ket agdepdepende pay la-eng iti koleksion ti nasional a gobierno.”

Kinuna pay ni Bueno a nupay nadagsen iti biang dagiti agbubuis, “panunotenyo met a saan nga agdur-as ti pagilian no awan dagiti buis a baybayadantayo… Tulongantayo koma ti gobierno.”

“Apay, sakitenyo laengen ti tumulong iti gobierno?” kinuna pay ni Bueno iti maysa a reactor bayat ti interbiona iti lokal a radio.

Comments are closed.