Footer

2,000 estudiante, empleado, bumarangay, nagmula iti kaykayo

CANDON CITY – Nasurok dua ribu nga estudiante, empleado ti gobierno ken bumarangay ditoy ti nagmula iti dua ribu a mahogany ken dadduma a seedlings idiay San Andres ken Palacapac ditoy itay nabiit kas paset ti Fiesta ti Bantay.

Kinuna ni Elmer Leano a namulaan iti mahogany ti agarup 90 nga ektaria a kabambantayan a sakup dagiti nasao a barangay a 180 meters ti ngatuanda iti sea level.

Mismo nga indauluan ni Candon City Mayor Allen Singson ken dagiti opisial ti siudad agraman dagiti national ken regional agencies ken offices iti rehion uno a pakairamanan ti Department of Agriculture nga indauluan ni Regional Director Nestor Domenden ti panagmula kas paset iti uppat a tawen a development program a pannakamula ti kabambantayan daytoy a siudad.

Kinuna ni Leano a duapulo nga ahensia ken opisina ti nagpirma iti Memorandum of Agreement (MOA) a pakairamanan ti city government ti Candon, congressional district, provincial government, Dept. of Agriculture, BFAR, Fiber Development Authority, DILG, DENR, Phil. Coconut Authority, NCIP, CFTC, DPWH, NIA, DAR, NTA, UNP, ISPSC, DEPed, farmers association, barangay Palacapac, San Andres, ken Bugnay, ken dadduma pay para iti panag-balligi daytoy a programa.

Nadasig dagiti lugar a nakai-mulaan dagiti grupo dagiti kaykayo, kas iti mahogany, maguey, fruit trees ken dadduma pay, innayon ni Leano.

“Pakpakauna pay laeng daytoy a panagmula. Addanto pay panagmula dagiti bumarangay agingga a mamulaan amin a paset ti lugar,” kinuna ni Leano bayat ti interbio kenkuana ti DZTP ken Tawid News idinto nga inyunay-unayna a tapno masigurado ti survival rate dagiti naimula, dagiti bumarangay ti mangaywan ken mangtaripato kadagitoy.

Adda pito a sibibiag nga ubbog iti nasao a lugar, ket daytoy ti kayat a padurasen ti gobierno ti siudad.