Footer

Naabuso a DH iti Singapore, tinulongan ti Ilocos Sur Hotline

P30,000 nabusbos ti ahensia, napakawan, libre pay pletena a nagawid

VIGAN CITY – Sabali pay a domestic helper ti natulongan ni Hon. Luis “Chavit” Singson babaen ti aglinawas a programa iti DWRS nga Ilocos Sur Hotline.

Itay Hulio 8, nagturong dagiti agassawa nga Arnel ken Arlene Tajon, 25, taga-Gen. Tinio, Nueva Ecija ngem agnaeden iti Cabusligan, Bantay, I. Sur, ket impeksada ti panagyamanda ken ni Singson ken iti Ilocos Sur Hotline gapu iti naurnos a pannakapagawidna iti probinsia, manipud iti Singapore a nagpaayanna a kas domestic helper.

Makalawas sakbayna, idi Hulio 1, nagkamang ni Arnel iti Ilocos Sur Hotline ket nagpatulong iti gobernador para iti pannakapagawid ti asawana.

Impalgak ni Arnel a dumawdawat ti maysa a Roselyn Chan, akinkukua iti ahensia, iti P30,000 a mapapati a nagastos ti ahensia iti panagturong ni Arlene iti Singapore.

Ngem kalpasan a timmawag ni Singson iti akinkukua iti ahensia a pagpa-paayan ni Tajon, imman-nugot ni Chan a palubosannan nga aggawid a dinan bayadan ti nabusbos ti ahensia. Libre pay ti tiket ni Tajon a nagsubli iti pagilian.

Nagturong ni Tajon iti Singapore idi Hunio 8 daytoy a tawen babaen ti tulong ti ipagna ngem kas turista ken babaen ti direct hiring.

Saan nga ammo ni Tajon a masikog gayam idi agturong iti Singapore ket impagarupna a reglana laeng ti panagpadarana.

Segun ken ni Tajon, agtrabaho iti aldaw iti opisina ti ahensia ken iti pagtaengan ni Chan iti rabii kas babaonen.

Naammuan pay ken ni Tajon a manipud simmangpet iti Singapore, di pay nakaraman iti innapuy no di panay a noodles a nabangles pay no dadduma.

Adun dagiti overseas Filipino workers a natulongan ti Ilocos Sur Hotline a pakaibilangan ni Marcos Rabon ken ti pamilia ni Gwen Aguilar, maysa met a domestic helper iti Singapore, a kinedngan ti korte ti nasao a pagilian a mabalud iti 10 a tawen gapu iti panangpapatayna ken ni Jane La Puebla, Filipina met laeng a domestic helper.

Iti kaso ni Rabon, nangted ti Hotline iti kuarta a nagpaay a blood money a naited iti pamilia ti napapatayna.

Malaksid iti panangtulong ti Hotline ken ni Edwin, ti asawa ni Gwen, iti panaggianna iti Singapore tapno ipaayna ti suportana iti asawana bayat ti pannakausigna, nangted pay ti provincial government iti P200,000 kas pinansial a tulong iti pamilia Aguilar ken P100,000 iti pamilia ni La Puebla.

Ti met la Ilocos Sur Hotline, babaen ti Gabriela Silang General Hospital, ti nangipaay iti tulong para iti pannakaraspa ni Tajon.