Footer

Wen mamatiak iti panagsubli ni gayyem (Umuna a Paset)

Kasta met kadakayo, masapul a sisasaganakayo, ta umayto ti Anak ti Tao iti oras a diyo ipagpagarup — Lucas 12:40


Karnero

1. Ti Nabirokan A Karnero

NAGRUPANGET ni John Asuncion iti nakaro nga ut-ot ken apges gapu kadagiti sugat ken bukol ken kammuol iti pangrapisen a rupana ken dagiti nagsinitan iti sigarilio iti panguttongen a bagi iti tayagna a lima a kadapan ken uppat a pulgada. Nariknana ti sippit ti init iti agalauna a malem. Kamkamatenna ti angesna. Labus iti makinngato ti pangrapisen a bagina ken nakapakleb. Deppa dagiti takiagna ken nagdippit dagiti sakana ta inyurnos dagiti nangdangran kenkuana a kasta, kalpasan nga imbaltogda ti bagina nga awanan puot, sada kinatkatawaan ken tinuptupraan.

Nasay-opna ti langsi ti nagsayasay a dara manipud kadagiti nabtak a naingpis a kiday ken sugat manipud iti babaen dagiti nalitem a paningkiten a mata. Aragaag ti panagkitana.

Nananamna ti dara manipud kadagiti bimtak a bibig. Ti langsi ti darana ket naigamer iti nakabarbara a sang-aw ti kasla makirkirog a talon iti abaga ti kalsada.

Immangad ken nagmulagat ngem agkurang ti pigsa ket nagdisso iti rengngat ti kabbarbasna itay bigat. Nupay kasta, impilitna latta ti nagmulagat ken tinangad ti asul a langit, ngem dina mailasin dagiti nakangatngato ti tayabda a sallapingaw. Sallapingaw a nakangatngato iti tayabda ngem iti kaanoman didanto magteng ti lugar a kalawagan ta nasken nga ited iti Emperador iti para iti Emperador.

Apagapaman a naungap ti ngiwat ni John Asuncion ket nagparang dagiti daradara a ngipenna.

Diosko, Diosko, tulongannak…kunana, ngem awan ti simngaw a timek: inulitna nga inyebkas, ngem itoy a gundaway ti magaw-at ti muging ket di kabaelan ti dila.

Nagkutikuti dagiti ramay ket narumek dagiti narasay ken nagangon a ruot. Immabut dagiti ramay iti kasla iket a rengngat, kimpet ket imbulosna aminen a pigsa, naitukol dagiti tumeng ngem naugotanen ti pigsa. Marie Joy…! inyikkis ti utekna idi naipinta iti mugingna ti nadungngo ken naanus ken naemma ken napintas nga asawana. John Carlo…! Maria Rita…! Mary Grace…! dagiti annakna nga agtawen iti sangapulo ket dua, sangapulo ken walo a kas iti panagsasagannadda, ngem nagtigerger laeng dagiti nabtak a bibig ket kaskasdi nga awan iti simngaw a timek no di laeng ti ikkis iti mugingna iti nagallangogang.

Diosko, Diosko, tulongannak…! Naibuang ti nauneg nga anges a sinaruno ti panagtayyek ti panagkitana ket inarakup manen ti sipnget…

Nakaragragsak itay ni John Asuncion. Menos dies para alas dose ti naipasirna iti kanigid a punguapu-nguanna.

Nainayad ti dapuen a Toyota Innova iti aspaltado a kalsada a panglinteganna nga agawid iti San Mariano—lima nga ili ti kaadayona iti siudad. Sarado dagiti tawa. Nakalukat ti aircon.

Nakimiting iti Farm and Poultry Supply Association iti probinsia nga inesponsoran dagiti manufacturer ti agrichemicals. Naragsak ta adda baro a suplayerna a nangikari iti dakkel a diskuento.

Tenkio, Lord, tenkio! kunkunana itay.

Inseksekna pay ti diskette iti personal CD/VCD/DVD/CD-R compatible player ket kinumpasannan ti naipatayab a kansion: Amazing grace! (how sweet the sound!)/ That sav’d a wretch like me!/ I once was lost, but now am found;/ Was blind, but now I see./ ’Twas grace that taught my heart to fear,/ And grace my fears reliev’d;/ How precious did that grace appear,/ The hour I first believ’d!

Umis-isem pay itay lalo idi nalagipna daydi panawen a nasipnget ti lubongna: “Sika ti krusko! Propesional ken mararaem amin a lima a kabsatmo, sika laengen ti dugyodugyot!” inyanug-og idi ni mamana idi agtutubo pay. Buridek ngamin ket bisiona amin a bisio. Innem a tawennan iti kolehio iti uppat laeng a tawen a kurso.

Ngem idi naam-ammona ni Marie Joy a maysa kadagiti laygo ti Singles for Christ, maysa a charismatic group, simmangpet ti nagawel a nakemna. Nagbaliw ti biagna.

Thro’ many dangers, toils, and snares, I have already come;/ ’Tis grace has brought me safe thus far,/ And grace will lead me home.

Mannakabalin ti Dios, kunkunana itay iti bagina, datdatlag dagiti wagas a panangidanonna iti grasiana kadagiti pinarsuana. Saan a mabatok ti panagayatna. Simmurot pay a nangilallay iti kansion: The Lord has promis’d good to me,/ His word my hope secures;/ He will my shield and portion be,/ As long as life endures.

Wen, awanen iti sapulen ni John Asuncion iti biag, ta taptapayaen ti Dios: napintas ken naanus ken naemma ken dakkel ti panagpuspusona nga asawa, nasisingpet ken masisirib nga annak a kanayon nga isab-itanna iti medalia ken ribbon kada turpos ti klase ken dida met ngatan agbisin iti negosioda a Farm and Poultry Supply iti tallo nga ili. Yes, when this flesh and heart shall fail,/ And mortal life shall cease;/ I shall possess, within the veil,/ A life of joy and peace./ This earth shall soon dissolve like snow,/ The sun forbear to shine;/ But God, who call’d me here below,/ Will be for ever mine.

Inawidna itay ti manibela tapno agpaigid idi dumikket sa nagbalangan ti asul a Besta van.

Nagikkis ti Innova iti kellaat a panagprenona. Sakbay a nakapagtignay, kalibre kuarentay singko ti ipatpaturong kenkuana ti nabaneg ken natayag a lalaki ken mangisensenias a luktanna ti ridaw. Nagamak ni John amangan no paltogan ti lalaki isu a nanglukat. Nakammet ti kueliona sa naguyod ken napuersaan a nairuar. Napaidda. Timmakder ngem pinarusokan ti lalaki. Nagkurinikon idi kasla mapugsat ti angesna. Apputna ti buksitna. Linawlaw ti sumagmamano a lallaki nga aggagarakgak. Pinilitna iti tumakder ngem kugtar ti simmabat iti rupana. Nagsasaruno dagiti danog ken kugtar a nagdisso iti bagina, kadagiti takiag ken luppo ken iti ulona. Sinamsamda ti kuartana a naikabil iti clutch bag ken iti petakana, innalada ti relona, ti kuentas, porselas ken singsingna. Mangngegna ti gargarakgak dagiti lallaki a kasda adda iti sabali a lubong?

“Mayat man a pagtripan daytoy nga alutiit, litsi!” nangngegna ti nabangag a timek a sinaruno ti gargarakgak.

[ Adda tuloyna ]