Footer

13-tawenna nga ubing, nagrimat iti chess fest

CANDON CITY – Gifted child, kunada iti Ingles. Dagitoy dagiti ubbing a mabigbigbig iti nadumaduma a benneg gapu iti naisalsalumina a kabaelanda. Maysa ditan ni Generose Razo.

Ni Generose ti maysa kadagiti umaayam nga imbaon ti Candon City idiay Jakarta, Indonesa tapno makisalip iti 9th Asian Age Group Chess Championship.

Nupay nagun-od ni Generose ti maikalima agingga iti maikapito a puesto iti individual competition, ti team a nakaikappenganna ti nangiyalat iti dua a silver a medalia iti blitz ken rapid competition. Maigapu iti daytoy, nagtungpal a maikatlo ti puesto ti Pilipinas iti over-all ranking kadagiti nasao a benneg, umuna ti Vietnam, maikadua ti Indonesia.

Iti interbio ken ni Generose, dinakamatna a daytoyen ti kaadaywan a napananna gapu iti panagay-ayamna iti chess. Kadagiti napalpalabas a tawen, nagkamkampeonen ni Generose iti Palarong Pambansa, IRAA, Milo Olympics ken dadduma pay a pasalip iti chess.

Kinuna ni Acting City Schools Div. Supt. Evangeline Rubang, ti gapuanan ni Generose ti nangiruangan kadagiti sumarsaruno pay nga atleta ti Candon a makapan iti ballasiw- taaw agsipud ta impakitana a kabaelanda ti makibalubal iti dadduma met a pagilian.

Kinaddua ni Alex Razo, agdama a PES coordinator ken education supervisor iti Candon City Division ni Generose iti pannakisalipna.