Footer

Kabassit ti mapaspastrek iti quarrying iti probinsia, linagidaw ti hunta prob’l

VIGAN CITY – Pinaayaban ti hunta probinsial iti naudi a sessionda ditoy ti agak-akem a provincial environment and natural resources officer tapno lawlawaganna no apay a bassit ti mapaspastrek ti probinsia iti panag-quarry iti igid ti karayan ken kabaybayan a sakup ti Ilocos Sur.

Ngem inkalintegan ni agak-akem a PENR Officer Bernard Salva kabayatan ti question hour ti session nga adda rigrigatna ti pannakagun-od iti nangato a koleksion manipud iti panagquarry iti probinsia gapu iti mapapati a kaadda dagiti sumagmamano a mayor ditoy Ilocos Sur a kayatda a manipularen ti mapastrek iti quarrying kadagiti hurisdiksionda.

Nupay kasta, saan a nadakamat no siasino dagitoy a local chief executive.

Sakbayna, kiniddaw ni Bokal Analiza Europa- Morales ti pannakaayab ni Salva tapno malawlawagan ti kinabassit ti mapaspastrek iti panagquarry iti probinsia.

Segun ken ni Morales, mapapati nga adda maisaysayangkat nga illegal quarrying, kasta met a nababa ti koleksion wenno mapaspastrek iti panag-quarry agsipud iti maipagarup a di pannakasursurot ti umiso a makolekta a bayad.

Kinuna ni Bokal Jerry Singson a patienna a nababa ken bassit unay ti koleksion no maikumpara iti mapaspastrek dagiti kabangibang a probinsia a kas iti Ilocos Norte, Abra ken La Union.

“No kitkitaen, ad-adu ken dakdakkel koma pay ti mapastrektay ditoy Ilocos Sur agsipud ta nalawlawa wenno dakdakkel ti natural resourcestayo ditoy,” kinuna ni Singson a nagpaay a kas presiding officer kabayatan ti nadakamat a session.

Indagadag ti hunta a mangiwayat ni Salva kadagiti addang tapno ngumato ti mapastrek ti probinsia iti panag-quarry.

Kabayatanna, ti panagquarry ti maitudtudo a kagagapu iti pannakateppang dagiti sumagmamano a coastal barangays iti Santa.

Maysa a residente ti nagkuna nga agtungpal a malayus ti barangayda agsipud ta iti igid ti pagalaan dagiti agbumbunag iti darat ken bato, gapuna a bimmaba daytoy a paset nga isu metten ti suroten ti danum.