Footer

LCSP, napabileg iti Ilocos Sur

VIGAN CITY – Napapigsa itay nabiit ti Local Committee on Sight Preservation (LCSP) ti probinsia.

Daytoy ti impakaammo ni Bokal Jeremias “Jerry” Singson, chairman ti committee on social services, ken health and sanitation kabayatan ti pannakiuman kenkuana ti Media itay lawasna.

Kinuna ni Singson a nasken ti pannaka-reactivate daytoy nailibayen a komite tapno maserbian a naimbag dagiti nakurapay nga umili a kumapkapsuten iti panagkitada.

“Babaen ti panangiwardas daytoy nadakamat a komite mataming dagiti maseknan nga umili ken maagapan ti nadaras a panagkadiperensia dagiti matada,” panangilawlawag pay ti Bokal.

Maipalagip a malaksid kadaytoy a programa, indagadag pay ni Singson ti pannakaipasdek ti Animal Bite Center tapno masaluadan ti salun-at dagiti umili nangruna dagiti makagat iti aso.

Sabali laeng ti panangilungalong ti bokal iti pannakaipasdek ti Blood Center ditoy Ilocos Sur no sadino a maideposito dagiti maidonar a dara manipud kadagiti naimbag ti panagpuspusoda nga umili

Kabayatanna, nagturong iti Cervantes, Ilocos Sur da Singson a kaduana dagiti opisial ti Department of Social Works and Services ken dadduma pay nga agtuturay tapno agiwarasda kadagiti relief goods kadagiti residente ditoy a biktima ti Bagyo Florita a nangsalapon iti probinsia itay nabiit. Sumagmamano nga aldaw a naipusing ti nasao nga ili gapu iti landslide.

Imbilin ni Gov. Luis “Chavit” Singson ti madagdagus a pannakaraat dagiti nagdissuor a bato, pitak ken kaykayo iti kalsada tapno makapagdaliasat dagiti residente. (Karaman ti report ni Rodie Taan)

Comments are closed.