Footer

Negosiante, natakawan

NARVACAN, Ilocos Sur – Natakaw ti agpateg P20,000.00 a tagilako a kukua ti maysa a negosiante iti barangay Santa Lucia, ditoy nga ili.

Nagpulong ti biktima a ni Danilo Yabut, 28, negosiante, ken agnaed ditoy a barangay iti kuerpo ti polisia maigapu iti panakatakaw ti dua a sako ti tsinelas, shortpants dagiti ubbing ken t-shirts nga agpateg iti nasurok P20,000.00 babaen dagiti saan a nabigbig nga agtatakaw.

Kinunana a naibati dagiti nasao a tagilako iti uneg ti Narvacan Public Market ket natakuatanda laengen nga awanen dagitoy.

Nainget met ti panangsapsapul ita dagiti panakabagi ti linteg kadagiti mannanakaw.