Footer

Wen mamatiak iti panagsubli ni gayyem (Maikadua a Paset)

Kinabkabilda manen. “Pangaasiyo koma, didak patayen. Ur-urayendak dagiti annako ken ti asawak…”

“Ti laeng luganmo ti kasapulanmi! Pang-iskor…” Tinaliawna ti lalaki a sumanusop iti nabilot. Ti nasiputanna nga immuneg iti Innova ken nagtugaw iti sango iti manibela iti nagmandar nga aggunaydan.

Inluganda. Idi agtartarayen ti van, kinabkabil latta dagiti nadangkok ken sininsinitda dagiti dakulap ken dagiti takiagna idi dina kayat iti sumusop iti nabilot wenno suminglot iti mapupuoran a pulbos iti silengsileng ti sigarilio…

2. Ti Doble Kara – 1

BUMANESBES ti panagpataray ni Julian iti Ford Expedition ni Kongresman Dionisio Sandoval. Agpalaud iti sementado a diversion road nga agturong iti siudad.

Pultak ti lakay a kongresman ken saan a kinabaelan ti atiddog ti manggasna a Barong Tagalog nga inlemmeng ti butiogna.

Nataytayag ni Julian iti tallo a pulgada iti tayagna ngata a lima a kadapan ken walo a pulgada ken maskulado. Agpadada a pamugoten, dadakkel dagiti matada a naibudak iti pangaan a rupa iti edadda a simmagpaten iti limapulo.

Adu iti agraem ken ni kongresman: adun ti pinabangonna nga eskuelaan ken waiting shed ken kalkalsada ken rangrangtay ken basketbolan ken barangay hall. Tinawen a sangapulo ti eskolarna iti kolehio. Tinulonganna amin dagiti immasideg kenkuana. Dipay naabak iti botos sipud pay idi damona a nagtaray a gobernador, kontraenna man wenno saan ti administrasion.

Ngem kadagiti nakabatoken ti linaon ti bitukana, alimatek iti takdang, kunada met: lord dagiti jueteng lord ken amo dagiti esmagler iti Puro Pingod.
Iti laksid kadagitoy, nabanglo latta ti naganna kadagiti relihioso, ta adun a simbaan ken kapilia iti probinsia iti binangonna wenno pinasimpana.

Ti kongresman ti maysa kadagiti dadaulo dagiti pulitiko iti makin-Amianan a Luzon.

“Boss, ti kad’ proyekto a multi-million viaduct dita ili ti San Manuel ti pagsaritaanyo ken ni gob?”

“Wen, isu a partakam ta suruak man nga agbiag. Nengneng ti lukdit!”

“Apay kadi, boss?”

“Rumbeng laeng a, a ti kababaan iti bid ti pakaitedan ti proyekto, saan?”

“Wen a, boss. Rumbeng la unay dayta, ta bidding ngarud! Ngem ti kangatuan ti bid ti gatad ti proyekto! Isu a kasapulan ti al-allia nga agbid iti nakangatngato…!” Ket nagdanggayen ti garakgak dagiti agamo. Kellaat a nagpreno ni Julian. Dandani naipasubsob ni kongresman.

“Ninam! Paltogak ta pispismon, ne! Tarimaanem met a ti agmaneho!”

“Boss, tao daydiay nakapakleb iti talon. Daradara.”

“Ay, lukdit! Bay-amon, inta ketdin!”

“Boss…?”

“No daradara a ket natayen, kangel! Inta ketdin amangan no data pay iti pabasolenda a pimmatay! Amangan no bumangsit pay ti naganko no makitadata dagiti AC ken DC a media. Inta ketdin, alistuam!” Ket insiweten ti nangisit a Ford Expedition…

3. Ti Doble Kara – 2

NAKABAMBANNAYAD ti taray ti nalabaga a Honda CRV ni Reverend Pastor Darwin Zapatero, ti nalatak a preacher iti probinsia ken kabangibang a probinsia ken iti siudad. Agpasiudad tapno mangasaba iti alastres iti programana iti lokal telebision. Nataer iti tayagna a lima a kadapan ken walo a pulgada. Awan iti kunes ti atiddog ti manggasna a puraw a Barong Tagalog nga asmang ti nakasilsileng a nangisit a pantalon.

Pamudawen ti pangrapisen a pammagina.

Kasla agtangkayag nga init dagiti matana — naraniag ken nabara — ket adu a babbalasang iti mangiparparipirip ti riknana itoy baro pay laeng a pastor nga agtawen iti tallopulo ket innem. Makaengganio ti nalamuyot a timekna no agsarita iti tallaong, iti radio, iti telebision ken kadagiti prayer rally.

Pasaray taldiapanna dagiti kimmarandikang a talon iti abaga ti kalsada. Solona ta gagangay a no kastoy a Domingo ket manmano ti lugan a dumalan ditoy diversion road.
Iti laeng tiempo ti klase ken opisina iti adduan ti lugan ditoy a kalsada a pangliklikan iti pagna-pag-ong a trapiko kadagiti dua nga ili iti sakbay ti siudad.

Nagmenor. Nagpreno. Nagpanunot. Immanges ti nauneg. Nagatras iti sangapulo ngata nga agpa. Impis-itna ti buton ket in-inut a nagpababa ti rikep ti tawa. Binang-esanna ti nabara a sang-aw ti kalgaw. Naipigket dagiti matana iti nakapakleb a lalaki iti talon. Nagmusiig. Nagpanunot.

Linuktanna ti ridaw.

Naibaddek dagiti nakasilsileng ken nangisit a sapatos a lalat kadagiti nagangon a ruot sakbay a nagsardeng iti rabaw ti nagrengngat a tambak. Dua a metro ngata ti kaadayona iti nakapakleb a tao.

Nakasango kenkuana ti lalaki. Daradara ken nakadippa. Awan pagan-anayna a makinngato.

Immanges ti nauneg ti pastor. Nataysa metten? dinamagna iti bagina. Tinaldiapanna ti relo iti punguapunguanna. Alasdos kinse iti malem. Simrek iti mugingna ti panangaskasabana iti telebision ken dagiti agur-uray nga arbanna.

Napartak dagiti nasileng a sapatos a nagsubli iti nakasilsilap a Honda CRV…

4. Ni Gayyem

PASARAY aguttot ti tambutio ti tumarakatak nga ungor ti gakgak a motorsiklo ti natayag, nasabang ti pammagina a lalaki.

Ikaykayab ti angin ti pagat-abaga a buokna. Nakasuot iti puraw a tisiert. Nalennek dagiti matana ken pamuskolen dagiti kurimatmatna. Iti tayagna a lima kadapan ken siam a pulgada iti kayumanggi a kudil, nainayad ti panagpatarayna iti sementado a diversion road iti panagturongna iti siudad.

Ti lalaki ket underwriter ti life ken non-life insurance. Parolado. Nabalud iti sangapulo ket lima a tawen sadiay New Bilibid Prison iti kaso a multiple-murder. Inkarona ti basol dagiti sabali. Nadusa ken nagtuok iti nakana iti krimen a dina met inaramid.

Tatangna ti manedier ti ahensia ti seguro isu a nakastrek iti trabahona.

Sangapulo ngata a metro iti kaadayona idi nataldiapanna ti lalaki a nakapakleb iti talon.

Nagmenor. Nagsardeng. Nabannayad dagiti askaw dagiti puraw a goma a sapatos a nangbaddek kadagiti nagangon a ruot. Nalayaw ti tambak.

Naiparintumeng ti kaki a pantalon iti nagrengngat a talon.

Dua a ramay ti kanawan ti naideppel iti tengnged ni John Asuncion.

Naduyok dagiti mata ti lalaki iti bag iti kargadera ti motorsiklona. Kalpasan dagiti dadakkel nga askaw, warwarwarennan ti bag. Napartak met laeng a nagsubli.

Ginuyodna ti siper ti bag. Inyaonna ti danum a naikabil iti kasla punguapunguanna a plastic sa nainayad a nangidisso. Naanat iti panangipadatana ken ni John Asuncion, sana sinakruy ti awanan puot sana imparabaw kadagiti naiparintumeng ken nabileg a luppona. Linukatanna ti danum, sana pinattogan ti rupa ni John. Indissona ti danum.

[ Adda tuloyna ]

Comments are closed.