Footer

Awan ti alternatibo

Iti pastoral statement nga imparuar ti Catholic Bishops Conference of the Philippines (CBCP) kalpasan ti dua nga aldaw a plenary ti 124 a kamkameng, impaganetget dagiti obispo a nupay respetarenda ti posision dagiti tattao wenno grupo nga agtarigagay a mangituloy iti pannakaaramat iti proseso ti impeachment a mangtun-oy iti kinapudno, “saan nga agregget iti agdama, a mangpabor iti proseso ti impeachment kas wagas a pangtunton iti kinapudno.”

Kinuna dagiti obispo nga agingga a ti proseso ti impeachment ken dagiti paglinteganna, kasta met iti pampanunot dagiti amin a makipartisipar a partido, kontra ken pabor, ket akayen ti awan sabali a motibo no di pudpudno a pannakipagrikna iti pagsayaatan iti amin, agbalin laeng ti impeachment a saan a produktibo nga ehersisio, ken umun-uneg a negatibo a panagkita dagiti umili kadagiti politiko–ken kannigid, kannawan ken sentro.

Kas ninamnama, naikkan iti nagduma nga interpretasion daytoy a waragawag ti CBCP.

Iti biang ti administrasion ken panangibalikas ni Press Secretary Ignacio Bunye, “abrsaenna ken amirisenna a sipapakumbaba ken sinsero a panangdayaw iti moral a balakad manipud iti pastoral letter ti CBCP agsipud ta “itanggaya ti mensahe dagiti adu a puntos ti panagkinnaawatan ken agsinnarakuy a panggep iti nagbaetan ti gobierno ken iti simbaan.

No patien ni House Majority Floor Leader Prospero Nograles, husto ti addang ti nasao a waragawag idinto nga innayonna a saan nga husto a lugar ti Kamara wenno Kongreso a pagbirokan iti basol wenno kaawan ti basol, iti Korte ti pakaikeddengan ti kaadda wenno kaawan ti naglabsingan, saan a a ti kongreso babaen iti kaso nga impeachment agsipud ta kas polisia, mangeddeng ti Kongreso, nasayaat man wenno dakes, iti pannakaikkat ti maysa nga opisial.

Iti met biang ti oposision, masdaawda no apay a kasta ti pagtaktakderan ti CBCP iti sanguanan dagiti alegasion a panagsuitik iti eleksion idi 2004, panagkunniber ken korapsion, ken dagiti pammapatay kadagiti militante a kumunkontra iti agdama nga administrasion.

Pagarigan ni Senate Minority Leader Aquilino Pimentel, nupay di makita ni Pimentel no kasano nga agdur-as ti impeachment agsipud iti ad-adu nga amang a kaadu ti bilang dagiti kaaliado ni Pres. Arroyo a mangkeltay iti impeachment, kenkuana, nakakaskasdaaw a saan a kumbinsido dagiti obispo a pagsayaatan ti publiko ti tuntun-oyen dagiti nagidatag iti complaint.

Kadagiti dadduma nga agilinlinteg, salsaludsodenda a no saan a pabor dagiti obispo iti impeachment a pangtunton iti kinapudno, ania pay ti wagas nga aramaten tapno rummuar ti kinapudno mainaig dagiti alegasion maikontra iti Presidente?

No paborda iti panangbirok iti kinapudno ngem saan a babaen ti impeachment, ania ngarud ti wagas? kinuna ni House Minority Leader Francis Escudero.

Iti biang ni Escudero, sursurotenda laeng ti nabatbati a legal ken natalna a wagas a panangtunton iti kinapudno ket no awan ti alternatibo nga itanggaya dagiti obispo, ituloyda a suroten daytoy a wagas.

Iti daytoy a pagtaktakderan dagiti obispo, agtultuloy a saan a maikkan iti gibus dagiti alegasion a panagsuitik iti eleksion idi 2004, mapapati a pannakaaramat dagiti pundo ti gobierno para iti pannakaidur-as ti kandidatora ti Presidente.

Ket agingga a saan nga ikkan dagiti agilinlinteg iti Kamara iti gundaway nga agdur-as ti impeachment complaint, agtultuloy met a suroten ti al-alia dagiti alegasion ti administrasion ni Pres. Arroyo bayat ti panagtakemna.

Iti sanguanan dagitoy, agtultuloy dagiti panagduadua iti kinalehitimo iti administrasion a mangkibkib iti pundasion ti kredibilidadna kas mangituray.

Iti kastoy a situasion, dagiti umili ken ti pagilian ti ultimo nga agsagaba. @tnm

Comments are closed.