Footer

Aplikante para guardia, aglasat iti drug testing

VIGAN CITY – Kinuna ni provincial warden Major Floro Martinez nga agdalan iti nainget a pannakaamiris iti droga dagiti amin nga aplikante para iti puesto a guardia iti pagbaludan ken iti provincial capitol.

Daytoy ti impaganetget ni Martinez kas sungbatna iti singasing ni Bokal Jeremias “Jerry” Singson a naing-inget a pannakasagat kadagiti aplikante para iti puesto a guardia para iti nasaysayaat a serbisio ti seguridad iti pagbaludan ken iti provincial capitol.

Insingasing daytoy ni Singson bayat ti panangidatag ni provincial warden Major Floro Martinez kadagiti uppat a pulo ket maysa nga aplikante para kadagiti bakante a posision iti provincial jail ken provincial security guards.

Kinuna ni Singson a kasapulan ti naing-inget a pannakapili dagiti agbalin a guardia tapno malapdan ti pannakapasamak dagiti kontrobersia iti napalabas a mapapati a panagkukumplot dagiti guardia ken dagiti balud iti pannakaiserrek iti maiparparit nga agas iti pagbaludan.

Agdagup iti 31 nga aplikante para iti 10 a bakante a puesto ti prison guard ken 10 nga aplikante para iti 4 a bakante a provincial security guard ti impresentar ni Martinez iti hunta probinsial iti naudi a session daytoy iti provincial capitol itay nabiit.

Kanaig daytoy, impakaammo ni Singson ti pananggatang ti Sangguniang Panlalawigan kadagiti armas a maited a kanayonan nga aramaten dagiti prison ken provincial guards a pakairamanan ti 5 a shotgun, 5 a cal. 38 ken 1 a 9 mm pistol.

Kasta met nga inaprobaran ti hunta probinsial ti kiddaw ni Martinez a nangiyunay-unay iti pannakailatang ti P120,000 para iti madagdagus a pannakagatang iti multicab nga aramaten para iti provincial jail.

Comments are closed.