Footer

Controlled dumpsite, maipursigi

NARVACAN, Ilocos Sur – Nupay adda dagiti naipasa a resolusion ken petision kontra iti panakalukat iti controlled dumpsite iti barangay Camarao ditoy nga ili, no aprobaran ti Department of Environment and Natural Resources Region 1, ipursigi ti municipal government ti panakalukat ti dumpsite iti daytoy a lugar.

Daytoy ti naammuan iti interview ken ni Mayor Edgar Zaragoza mainaig iti daytoy a banag.

Kinuna ti mayor a normal a pagkedkedan dagiti sumagmamano a bumarangay nga iti lugarda ti pakaipasdekan iti pagbasuraan, a kas met laeng iti dadduma a luglugar, ngem iti panaglabas iti aldaw, makitada met laeng ti pagsayaatanna, ket dita nga anamonganda met laeng daytoy.

Kinuna met ni Engr. Eleuterio Ines iti municipal engineering office a ti pagbasuraan iti Camarao ket controlled dumpsite, kayatna a sawen, nainget daytoy a maaywanan tapno saan a makaapekto iti salun-at ken aglawlaw dagiti agnanaed ditoy ken kabangibangna.

Maipalagip nga adda resolusion ti barangay council ti Camarao agraman iti petision ti Lungog ken parish pastoral council ti Narvacan a nangipeksaanda iti panagkedkedda nga iti lugarda ti pakaikabilan ti controlled dumpsite.

Itay nabiit, pinasiaren ti DENR ti nasao a lote, ket no makita a napintas ditoy a pagibasuraan, awan ti maaramidan ti municipal government no di tungpalen ti mandar a masapul nga adda dumpsite ti maysa a munisipio, nakuna ti mayor.

Kukua ti gobierno ti lote ket daytoy ti maysa a rason no apay a ditoy ti nakita ti municipal government a pakaipasdekan iti controlled dumpsitena.