Footer

Ited kadakuada ti respeto iti panawen a kasapulanda

ITI PANUNGAD a paset ti State of the Nation Address ni Presidente Gloria Macapagal-Arroyo, naisem a nangipakaammo a dimtengen iti pagilian ti 232 a Pinoy a naggapu iti Lebanon.

Dagiti 232 a Pinoy ti immuna a grupo dagiti mangmangged nga inkapilitan a naggawid gapu iti gubat iti Lebanon.

Nagmayat a denggen ti waragawagna ta insangbayna ti bang-ar gapu ta nakaradkad a nakasangpet dagiti kakailian iti pagilian kalpasan ti panagsagabada iti buteng, aliaw, amak ken di natalna a panunot gapu iti rimsua a gubat iti pagtrabahuanda a pagilian.

Mapattapatta nga aganay a 30,000 a Pinoy ti agtrabtrabaho iti Lebanon iti pannakaburak ti hostilidad iti nagbaetan ti dua a pagilian.

Sakbayna, impasingked pay ni Pres. Arroyo ti panangipaay ti turayna iti tulong ken panangsalaknib kadagiti amin a kailian a napupok iti Lebanon.

Impasingked met ti Overseas Workers Welfare Administration nga adda pundo iti ikutna a madadaan nga aramaten para iti pannakaibakuit dagiti kakailian manipud iti Lebanon.

Ngem rimsua dagiti saludsod ken panagduadua no adda nakasagana a contingency plan ti turay ken ti OWWA iti isasangbay ti kastoy a situasion gapu iti mapaliiw a naginad a pannakaibakuit dagiti naipit iti gubat a kadaraan.

Sumagmamanon nga aldaw ti napalabas kalpasan ti panangrugi ti gubat iti Lebanon idi ibaon ti turay ni Cimatu a mapan mangamiris iti situasion iti dayta a pagilian ken mangiwardas iti nasayud a pannakaibakuit dagiti kadaraan no kasapulan.

Itay la Hulio 23 a nagbiahe ti umuna a batch dagiti OFWs a kadaraantayo. Kalpasanna simmaruno ti 37. Sa manen 80.

Kadagiti sabali a pagilian, apaman a nagbettak ti hostilidad iti nagbaetan ti Israel ken Lebanon, makarkarattoten dagiti agtuturayda a nagbunag kadagiti rinibu a nasionalidadda. Nangarkilada iti eroplano, bus, bapor ken dadduma pay a transportasion para iti madagdagus nga evacuation dagiti umilida.

Iti sabali a bangir, sagsaginnit ti napagawid pay ti gobierno iti baet a rinibu dagiti agur-uray a maibakuit. Pagsayaatanna ti kaadda ti maysa a simbaan iti babaen ti maysa a Filipino a padi ket naaddaan dagiti kakailian iti lugar a nagpaingan.

Sumangkautro, nagpaarayat ti ambassador iti Lebanon a naibbusen ti pundoda idinto a dinagdagna ti Department of Finance a mangipatulod iti pundo para iti pannakaibiahe a madagdagus dagiti kailiantayo nga OFWs.

Kinuna ni Alfrancis Bichara, ambassador ti pagilian iti Lebanon a gapu ta awan pay ti naawatda a kuarta, kumakauddan manipud iti $50,000 a budget manipud iti napastrek ken contingency fund ti embahada.

“Adda (opisial iti Manila) koma nakasagana a pundo, idarasda koma a pagtignayen ti pundo,” kinuna pay ni Bichara idinto nga impettengna a takderanna dagiti sinaona.

Adda nakasagana a kuarta a busbosen para iti panagbakuit dagiti kakailian, kasta ti impanamnama ti turay. Binabalaw pay ti DFA ni Bichara gapu kadagiti insawsawangna a makapaburibor laeng iti panunot dagiti evacuees ken manglapped iti nasayud a pannakaibakuit dagitoy.

Ti saludsod: no adda pundo, apay a sagsaginnit ti maibakuit a kadaraantayo? No adda pundo, apay a kasta unay ti panagpaarayat ti turay kadagiti sabsabali a pagilian para iti pannakaibakuitda?

Naimbag ta adda ti International Organization for Migration ken maysa a Greek tycoon a nangikari a tumulong iti pannakaibakuit dagiti kakailiantayo a naipit iti gubat.

Dagitoy nga OFWs ti sangkadayaw ni Pres. Arroyo a bannuar iti moderno a panawen. Dagitoy ti mangsursur-ay iti agnguynguy-a nga ekonomia babaen dagiti remittances nga ipatpatulodda kadagiti pamiliada.

Ita, kasapulanda ti pannaranay manipud iti gobierno. Karbenganda ti matulongan iti panawen a kasapulanda ti tulong. Pagrebbengan ngarud ti turay nga ipaay kadakuada ti pannalaknib ken respeto kas tao a saan ketdi nga agpampannuray lattan iti kaasi manipud kadagiti sabali a pagilian.

Nagkas-ang a panunoten nga iti baet a pagbibiagan ti turay dagiti OFWs, dina man la maited ti madagdagus a saranay iti panawen a kasapulan dagitoy. Laglagipen koma dagiti agtuturaytayo a dakkel ti maitultulong dagiti OFWs iti panagdur-as ti ekonomiatayo gapu kadagiti remittances nga ipawpaw-itda iti pagilian.

Iti naginad a pannakaipaay iti makapnek a tulong kadagiti agkasapulan a kakailian, agballatek la ketdi iti turay, agbalin a mantsa a narigatnanto a punasen iti panunot dagiti OFWs.

Comments are closed.