Footer

Super regions, preparasion iti pederal a gobierno – Chavit

VIGAN CITY – Kinuna ni Gov. Luis “Chavit” Singson a napigpigsada a makipatang kadagiti agipupuonan manipud iti ballasiw-taaw babaen ti pannakapormar dagiti super regions.

Kinuna ti gobernador nga iti naudi a miting ti Gabinete idiay Isabela, napagtutulagan nga agtitipon amin a probinsia nga agaasideg iti Amianan tapno agbalin a super region ket iti kasta “dakdakkelda a makipatang kadagiti investors manipud iti ballasiw-taaw.”

Iti State of the Nation Address ni Pres. Arroyo iti panaglukat ti Kongreso itay Hulio 24, inwaragawagna ti pannakaipasdek dagiti super regions a mangirubbuat iti panagdur-as iti ekonomia ti pagilian.

“Kas daydiay sigud(en) nga imbagbagak idin a napimpintas nga adayo no adda pagbaliwan ti Pilipinas, daydiay Federal system,” kinuna ni Singson bayat ti interbio kenkuana ni Jun Ramos, host ti Barangay Commando-Brigada, sana innayon a ti pannakaipasdek dagiti super regions ket preparasion iti pederal a gobierno.

Kadagiti immun-una nga interbiona iti media, kinuna ni Singson a pabor iti pederal-presidensial a porma ti gobierno.

Iti SONA ni Pres. Arroyo, nadakamat pay ti Presidente dagiti proyekto ti gobierno iti probinsia kas iti Banaoang Pump Irrigation Project ken ti pannakadevelop ti seaport iti Cabugao, Ilocos Sur.

“Nabayagen a tagtagaineptayo a nagbalinen,” kinuna ni Singson sana innayon a “daydiay ti dakkel a namnamak a saantayonton nga agipatulod iti agtrabaho iti ballasiw-taaw, (agsipud ta) adunto ti pagtrabahuan iti probinsiatayo.”

Kinuna ti gobernador nga apektaran ti pannakaipasdek ti seaport ken yaay ti adu a paktoria saan laeng a ti probinsia no di pay ti intero a Region I.

“Daydiayto ti pagtapuakan dagiti adu nga investors nga umay,” kinuna ni Singson sana impalagip a daytoy ti sangkaibagana iti manon a tawen: agsayaatto ti probinsiatayo iti masangsanguanan nga aldaw.

Kinuna ni Singson a no madevelop ti seaport iti Cabugao ken agluppias ti China, awan sabali a pagtapuakanna no saan a ti Ilocos Sur agsipud iti kaasideg ti nasao a pagilian iti probinsiatayo.

Kinuna ni Singson a masolbarton ti problema ti panagsisina dagiti pamilia gapu iti panagtrabahoda iti ballasiw-taaw, agsipud ta adu dagiti paktoria nga umay iti probinsiatayo.

Impalgak ti gobernador a sakbay ti kasangayna, nagturong iti China ket pinirmaanna ti contract-agreement para iti pannaka-develop ti seaport iti Cabugao.

“Iti panangkumpirma ni Apo Presidente, napintas la unay ta matuloy a matuloy daytoy a programa,” kinuna ni Singson.

Kinuna ti gobernador nga awan ti problema iti pundo iti pannaka-develop ti seaport agsipud ta ti China ti mangpundo iti proyekto.

“Datayo ti kasiguruan, nalpasen ti planona, addan pundona,” impatalged ni Singson.

Comments are closed.