Footer

Wen mamatiak iti panagsubli ni gayyem (Maudi a Paset)

KINAUT ti kanawanna ti puraw a labakara iti bag sana binabasa ken nakaan-anat nga impunasna iti rupa ni John Asuncion. Limmabaga ti labakara. Sinuyatanna iti danum ti rupa ket nagareng-eng ni John. Nupay sisasakruy ti lalaki ken ni John, intuloyna latta ti nangpunas kadagiti dara iti sugat ti rupa ken bibig ken dagiti takiag ni John Asuncion. In-inut a nagmata ni John Asuncion kalpasan ti nagsasaruno a panagareng-engna. Naisem a rupa ti naitambad kenkuana.

“Gayyem, addaka iti naimbag nga ima…”

Di makabalikas ni John Asuncion. Nagasug idi naidepdep ti labakara iti ngiwngiwna. Kamkamatenna ti anges ta agkupit ti barukongna.

“Uminumka, gayyem?” Nagungap ti ngiwat ni John Asuncion, napattogan ngem naiyula a dagus ti danum a natibnokan iti dara. Naimarka iti mugingna ti aragaag a ladawan ti dina am-ammo a “gayyemna”. Marigatan nga umanges ken dimmagsen ti barukongna. Nagtayyek ti lubongna ket inalun-on manen ti sipnget…

Karnero

5. Ti Doble Kara – 3

NAGSARDENG ti gakgak ken kusnaw a nalabaga a motorsiklo iti sanguanan ti Holy Pious Clinic. Sinakruy ti lalaki a nabaneg ti awanan pay laeng iti puotna a John Asuncion. Dina tinaliaw ti natumba a motorsiklo. Napartak ti iseserrekna ngem naalikaka ti panangidissona ken ni John Asuncion iti katre a depilid a naap-apan iti puraw.

“Sibibiag pay, dok!” kuna ti unipormado a nars.

“Ania ti naganna?”

“Diak ammo, dok. Nakitak a naidasay iti igid ti kalsada.”

“Arikapem man dagiti bulsana?” Naalikaka a pinasikig dagiti natibker a takiag ti lalaki ti bagi ni John Asuncion ket inarikapna dagiti bulsa iti likud ti nangisit a pantalon. Pinadatana manen. Dagiti bulsa iti sango. Awan ti maarikapna. Nagsasabat dagiti innem a mata.

“Asino ngata?” ti nars a seksi, kalalainganna iti tayag iti immal-o a pammagi. Napukawen ti raniag dagiti matana itay a nangsabat kadagiti mata ti doktor a kasla adda ibagbagana. Agtayag ngata iti lima kadapan ken maysa a pulgada ti doktor, narapis ken pamudawen, ken nakabulsa dagiti imana. Nalatak ti doktor ditoy ilina, saan laeng nga iti propesionna no di pay kas maysa nga opisial ti ecclesiastical a gunglo, ti Professionals and Businessmen Saturday Night Club. Mulmulenglengan lattan ti doktor ken ti nars ti pasiente.

Nauneg ti sennaay ti lalaki sa naglingaling idi nakalang-ab iti napas-eng a dinengdeng. Kinautna ti waletna iti makinlikud a pantalonna, inukradna iti sango dagiti dua a kasla inrantana nga impakita ti linaon ti waletna.

“Dua ribu a pisos laeng ti linaon ti waletko, dok. Koleksionko. Itedko kadakayo ket taripatuenyo daytoy a lalaki agingga iti kabaelanna ti agawid. Inton agsubliak, bayadakto ti kurangna. Agsubliak nga agsubli…” Indiayana ti dua a sagsasangaribu a pisos. Ngem awan ti mangawat ti kuarta isu a nainayad ti lalaki a nangidisso iti katre. Nasiputan ti lalaki a nagtinnaliaw ti nars ken ti doktor. Binulosan ti lalaki ti nauneg nga angesna sana tinaliaw ti agaw-aweng nga aircon.

“Sige…” kuna ti doktor ket tinaliawna manen ti nars. Pinidut dagiti muldotan ken napipino a ramay a nakiuteksan iti nalabaga ti kuarta. Nagpakada ti lalaki.

“Di la mabalin a maammuan iti kinaasinoyo?” kuna ti doktor.

“Gayyem….maysa a gayyem,” insungbat ti lalaki ket kunam la no nakuriente ti nars ken ti doktor iti intalukatik a ragsak ti isem ti lalaki. Isem a makaali. Ket nakarikna iti naisangsangayan a ragsak ti nars ken ti doktor iti dayta a gundaway. Adda mahika ti isem ti lalaki! Naisurot dagiti uppat a mata iti nasabang a likudan ti lalaki a nakabambannayad dagiti askawna…..

6. Ti Panagsubli Ni Gayyem

KALALAINGANNA laeng ti kalawana ti siled a napintaan iti puraw. Puraw a tiles ti flooring. Iti kanigid a suli ti lamisaan ni Dr. Jeremias de la Cruz. Iti masanguanan ti lamisaan iti kanawan, nakatugaw ni John Asuncion iti katre a naap-apan iti puraw. Tinaliawna ti relo iti ngatuen ti diding: menos dos minutos para alas sais iti malem. Gapu iti kabbibaw iti ngiwngiwna, agbeddal ni John Asuncion iti pannakisaritana iti selpon a binulodna ken ni Dr. de la Cruz. Iti likudan ti naurnos a lamisaan, basbasaen ni Dr. de la Cruz ti nalabaga ken napuskol a Medical Book. Iti kanawan ti doktor, ti sangaboklet a pagsursuratanna iti reseta ken ti bassit nga stapler. Iti kanigid daytoy, ti kalalainganna ti kadakkel a nakaukrad a nangisit a Biblia ken maysa a bassit nga asul a Biblia. Iti bassit a lamisaan iti suli iti abay iti immaratiddog a kahon ti index card, nakapsut ti maipatpatayab nga Amazing Grace iti radio cassette.

In-inut ken naannad a bimmaba ni John Asunsion iti katre. Pinindotna ti selpon. Agsigkisigking ken nainayad nga immasideg iti lamisaan. “Ahhamanak hunay, hok…” nabannayad ti panangidisso ni John Asuncion ti selpon iti nasileng a lamisaan.“Ahhuhongen nihoy hi hasawa hen nahihi annahho. Hadda hanuana a powlis.”

“Nasayaat ngarud, John. Ngem talaga a napigsakan?”

“Habaelahon, nok,” ket inapputna ti ngiwatna a nagkabbibaw.

“Praise the Lord! Amen! Saanmon a panunoten ti bayad ti nausarmo ken dagita iyawidmo nga agas. Kasta met ti doctor’s fee. Nabayadanen ti rebbengem…”

“Ha? H-hahino hi hagbayad, hokhor?”

“Ti lalaki a nangitulod kenka ditoy.”

“H-hania hano hi haganna, nok? Tahahano?”

“Dina imbaga…”
“Hanian? Hahano halud ha mahapaghamanah henhuana…?”

“Maysa a gayyem kunana met lattan idi dinamagko ti kinaasinona. Agsublinto kano. Agsubliak nga agsubli, kunana.”

Naipigket dagiti mata ni John Asuncion iti nakalukat a Biblia. Lucas 10 ti bersikulo a nabasana. Nagsabat dagiti matada ken ni Dr. de la Cruz nga umis-isem.

“Mamatika nga agsublinto ni gayyem?” Nagsasalip dagiti uppat a mata, napaut, agsasaritada ket isuda laeng iti agkikinnaawatan. Adda datdatlag a lengguahe dagiti mata a dagiti laeng makinmata ti makaawat. Datdatlag a lengguahe a saanen a kasapulan pay ti balikas: a kas iti ragsak dagiti piek ti agila iti isasangpet ti inada iti umokda iti tuktok ti katayagan a kayo iti birhen a kabakiran; kas iti panagawid ti ama iti pamiliana; kas iti sangsangkamaysa a panagpalaud dagiti kannaway; kas iti panagsurong dagiti ipon iti sabangan; kas iti panagayus ti baresbes; kas iti panagrusing dagiti bunubon; kas iti panagpitel dagiti sabong ken ti isisingising ken ilelennek ti init…

Yes, when this flesh and heart shall fail,/ And mortal life shall cease;/ I shall possess, within the veil,/ A life of joy and peace./ This earth shall soon dissolve like snow,/ The sun forbear to shine;/ But God, who call’d me here below,/ Will be forever mine.

“M-mamahihak, hok, aghubliho hi hayyem…”

“Agridamak iti panagsublina…” Pinidut ti doktor ti bassit a Biblia ket timmakder a nangiyawat ken ni John Asuncion.

“Sagutko kenka, John. Pakalaglagipam iti panagam-ammota.”

“Hayyamanak hunay, hok…” ket nabara ken nairut ti pinnetpet dagiti dua a dakulap…###

Comments are closed.