Footer

Assessment test ti TESDA, naisayangkat

CANDON CITY – Innem a pulo ket maysa ti nangala iti assessment exam nga insayangkat ti TESDA ditoy itay nabiit.

Daytoy ti naammuan ken ni Francis Toquero, agdama a City Technical Education Coordinator (CTEC) ti siudad.

Naisayangkat ti eksaminasion iti Candon Civic Center, ket malaksid kadagiti taga-Candon, adda pay dagiti nageksamen a naggapu iti sabali a munisipalidad.

Nairaman kadagiti technical courses a sinaklaw ti eksaminasion ti carpentry, masonry, mechanics, electricity, plumber, draftsman, data encoding, computer technician, cosmetology, security services, housekeeping, driving ken dadduma pay.

Paset ti caravan ti TESDA ti skills competent assessment a mangisayangkat iti eksaminasion iti nadumaduma nga ili.

Malaksid iti Candon, naisayangkat pay ti eksaminasion idiay Narvacan, San Esteban, Tagudin ken dadduma pay nga ili.

Naammuan a maikkan iti sertipiko dagiti makaruar iti nasao a test.

Kabayatanna, tallo manen a barangay ti nakaisayangkatan iti Integrated Pest Management (IPM) Kasa-kalikasan tapno agadal dagiti mannalon iti kabaruanan a teknolohia ti panagtalon iti daytoy a siudad.

Kinuna ni Elmor Leano, agdama a city agriculturist, a ti Cubcubbuot, Villarica, ken Bagani Gabor dagiti barangay a nakaisayangkatan ti panagadal iti daytoy a tawen.

Kinuna ni Mayor Allen Singson a tinawen a mangisaysayangkat ti opisina ti agrikultura ditoy Candon iti IPM classes tapno maparang-ay dagiti mannalon babaen ti ad-adu nga apitenda iti kataltalonanda babaen ti panagadalda iti umno a wagas ti teknolohia.

Sumurok-kumurangen a duapulo a barangay ti nakaisayangkatan daytoy a programa.

Tinawen a nasurok a sangagasut a mannalon ti agturpos iti daytoy a panagadal. Uray ti mayor, nakipagraep tapno maipakitana kadagiti mannalon no kasano ti kinapateg ti panangpapintas iti apit.

Kadagiti napalpalabas a bulan, naisayangkat pay ditoy ti IPM-corn ken vegetable tapno naan-anay ti panakatulong kadagiti mannalon iti baro a teknolohia iti panangpaadu iti produksion iti mais ken natnateng.