Footer

Daytoy a ti aso

Napudno a gayyem. Kaadduan ken kapintasan amin a makuna dagiti managayat iti aso wenno pet lover.

Isu nga iti Siudad ti Baguio ken ti kabisera ti Probinsia ti Benguet, ti La Trinidad Valley, nainget la unay iti panangmonitor dagiti animal lovers iti panagsida iti “napudno a gayyem.” Nainget iti pannakabantay kadagiti amin nga entry point ti siudad, ta ngamin kaadduan kadagiti aso a mailaklako iti merkado ti siduad ken iti La Trinidad ket aggapu pay iti Southern Tagalog. Saanen a mabilang dagiti nakasuan iti panagidaliasat ken panaglako kadagiti trinak wenno sanga-close van nga aso. Naserraan dagiti nireid dagiti pannakabagi ti linteg a pagpartian ti aso. Nagsagrap iti kondenasion dagiti restaurant ken kantina nga aglaklako iti naluto a karne ti aso. Nababalaw pay ti probinsia ti Benguet babaen ti internet gapu iti kinaawan iti serioso nga addangna maipapan iti animal welfare act. Banag a saan nga inayonan ti probinsia daytoy nga akusasion ta panguartaan laeng kano ti akinkukua ti pribado a website ti anunsiona ken kondenasionna babaen ti inna panagdawat iti donasion.

“Awanen, padre! Sapay no di makasidsidaak! Tunsoy metten ti lakoda!” daytoy man ti insanamtek ni (Ret.) P/Director Dugayen kaniak itay napalabas. Kagapgapuna kano sadiay La Trinidad ta mapan koma gumatang iti naluto a karne ti aso.

“Nabara pay laeng, bossing…” kuna ti maysa kadagiti aglaklako idi iti merkado ti siudad idi dinamagko no apay a karne ti kalding metten ti lakona.

Kayatna a sawen, nainget pay laeng ti pannakamonitor iti panaglako ti karne ti aso iti merkado ti siduad. Iti siudad ken iti probinsia ti Benguet, nainget ti panangipatungpalda iti linteg a ti panagparti iti aso ket para laengen iti ritual, nga isu dayta ti ipalubos ti animal welfare act.

Ngem sadiay Florida, USA, sinalbar ti aso ti biag ti amona babaen ti panangawagna iti selpon ti medical emergency team ti 911. Nagdikar ti diabetes a sakit ti amo, ket naawanan iti puot, ngem saan a nagpangadua ti aso, kinagatkagatna ti selpon ti amona ket naidayalna ti 911. Aso a tumanaul ti nangngeg ti 911. Impagarupda lattan a maysa dayta nga emerhensia isu a nagdardaras dagiti kamengna a nangammo no sadino ti yan ti awag. Babaen ti locator, natuntonda ti amo nga awanan puot. No nabaybayag la bassit ti isasangpet dagiti kameng ti medical emergency, natay koman ti amo.

Immawat ni Belle, nagan ti aso, iti maysa a pammigbig manipud iti Vita Wireless Samaritan Award, inreport ti BBC News USA. Kompania ti selpon ti Vita Wireless a nangiprogram ti tagilakoda iti madagdagus nga awag ken locstion ti unitda iti medical emergency team ti 911.

“No awan ni Belle, natayak koman ita,” kuna ni Mr. Weaver. “Saan laeng a basta aso daytoy a tarakenko, no di pay maysa a napudno a gayyem.”

Maysa laeng daytoy kadagiti nagkaadu a testimonia maipapan ti aso a kas napudno a gayyem ti tao.

Ngem iti kabambantayan, a kas iti Benguet ken ti Siudad ti Baguio, kasapulan ti bagi ti karne ti aso ken gin no panawen ti panaglalam-ek. No managlalamminka, kasapulan ti karne ti aso ken gin. Nabara iti bagi ti karne ti aso ken gin. Isuna laeng ta makapahayblad ti naynay a pannangan ti karne ti aso ken panagsiat iti gin lalo no napudot ti panawen ken lalo pay kadagiti addaan ganna ti salun-atna.