Footer

Masuspetsa a pusher, nakasuan

NARVACAN, Ilocos Sur – Nakasuan ti maysa a residente ditoy gapu iti panagikutna iti maiparparit nga agas.

Naipilaan iti kaso a possession of illegal drugs ni Erwin Cabanas, 20, baro, residente ti San Jose, ditoy iti Assistant Prosecutor’s office iti Candon City.

Natiliw ni Cabanas kalpasan ti buy-bust operation nga inwayat ti PNP ditoy ken ti Philippine Drug Enforcement Agency itay Hulio 28 iti maysa a videoke bar iti Sta. Lucia ditoy nga ili a nagpammarangan ni PO1 Diamond Amor Verbosa a kas gumatang.

Nakumpiska dagiti polis ti maysa a heat-sealed plastic sachet a mapapati a naglaon iti shabu ken ti marked money iti ikut ni Cabanas.

Kabayatanna, dua a lalaki ti natiliwan iti maiparparit nga agas iti nagsina a buy-bust operation nga insayangkat dagiti pannakabagi ti linteg iti panangidaulo ni PCI Marlo Castillo iti Narvacan, Ilocos Sur, itay nabiit.

Iti interbio ken ni Major Castillo, kinunana a natiliwan ni Loreto Cabunoc iti barangay Dinalaoan, daytoy nga ili. Nagresulta ti operasion iti pannakaala manipud ken Cabunoc iti marked money ken dua a plastic sachet a naglaon iti mapapati a shabu ken agdagsen iti maysa a gramo.

Iti sabali nga operasion a naisayangkat ken ni Ronnie Cabuslay iti barangay San Pablo iti daytoy met la nga ili, nagresulta iti pannakaala manipud kenkuana ti marked money ken 48.5 a gramo ti mapapati a binulong ti marihuana.

Maisagsaganan ti pannakaipila ti kaso a panaglabsing iti Republic Act 9165 kontra kadagiti dua a mapapati a drug pusher.