Footer

Nagbakuit nga OFW: Gubat iti Lebanon, nakabutbuteng a padas a di malipatan

VIGAN CITY – Maysa a nakabutbuteng a padas a saan a maikkat iti panunotna.

Daytoy ti panangiladawan ni Wilma Castañeda, 36, taga-Purok a Dakkel ditoy, iti gubat iti nagbaetan ti Israel ken Hezbollah guerrillas bayat ti interbio kenkuana ni Jun Ramos, host ti programa a Barangay Commando-Brigada a naipatangatang iti DWRS itay nabiit.

Karaman ni Castañeda kadagiti walo a Filipino overseas workers a simmangpet iti pagilian itay Hulio 23 a nangbukel iti umuna a grupo a naibakuit manipud iti Lebanon.

Kadua ni Castañeda dagiti kaprobinsiaanna ditoy Ilocos Sur a simmangpet iti pagilian da Sonia Andaya, Buguias, Sta. Cruz, Ilocos Sur; Rosario Conchita Medel, Villarosa, Sta. Cruz; Revelyn dela Rosa, Damacuag, Sta. Lucia; Herminia Tolentino, Poro, Magsingal; Flordeliza Grace Lazarte, Tamurong 1st, Candon City; Cherry Luz Salibad, Salcedo; ken Leslie Velasco, Calungboyan, Candon City.

Karaman iti 2nd batch da Zorayda Bang-asan, Galimuyod; Marites Barroga, Elizabeth Barroga, Eloida Barroga ken Estrella Dario, agpapada a taga-Paratong, Vigan City; idinto a naikuyog ni Heidi Galangco, taga-Bugnay, Candon City, iti third batch.

Naammuan nga aggawid koman ni Castañeda iti Pilipinas idi Hulio 14 ngem nabomba ti eropuerto idi Hulio 12.

Kinuna ni Castañeda, ina ti lima nga ubbing, a 100-200 metro laeng ti kaadayo ti pagtaengan ti amona iti bomb site, ket idi Hulio 17, nagpatnag ti panagbomba iti lugarda nga iti babana ti pakasarakan ti kampo dagiti soldado, gasolinaan ken industrial a pasdek.

Innayonna nga impaing ida ti amona iti balay-bakasionanna iti bantay a naggiananda iti dua nga aldaw.

Ditoy ti nakaammuanna iti kaadda ti evacuation center a pagpaingan dagiti padana a Filipino a naipit iti gubat.

“Idi makitak a rimmigat ti situasion… naglagawak… su a nagdisidirak nga aggawid. Adukami a nagdesidir nga aggawid,” kinuna ni Castañeda.

Pagsayaatanna ta idi agpakada iti amona, pinalubosan daytoy ken intedna ti sueldona.

“Saanda (amona) nga ipaiggem ti sueldomi iti unos ti dua a tawen,” impalgak ni Castañeda idinto nga innayonna a panagigawidda ti sueldo agsipud ta adu dagiti kadaraanna a manglibas iti amoda gapu iti saan a nasayaat a pannakatratoda.

Inannugot ni Castañeda a narigat ti kasasaadda iti evacuation center.

“Talaga a saanka a makaidda. Agtugtugawka lattan. Gapu iti kaadu ti tao, dika makaturog,” insalaysay ni Castañeda idinto nga innayonna a bassit unay ti itedda a taraon agsipud iti kinakurang ti abasto.

Kinuna ni Castañeda nga idi maibiaheda a mapan iti Syria, bayat ti kaaddada iti lugan, awan ti danum ken makan.

“Iti nagmalem nga addakami iti lugan nga umalis iti Syria, talaga nga inibturanmi ti bisinmi ken wawmi,” kinuna ni Castañeda.

Kinunana nga idi simmangpet iti balayda, “talaga nga urayak la nakasangit iti ragsakko a nasangpetak ti pamiliak a nasalun-atak.”

Impaganetget ni Castañeda a planona ti agsubli a mangged iti ballasiw-taaw ta agpagpagadal pay laeng.

Comments are closed.