Footer

Nakiddaw, tax exemption para dagiti mannalon

VIGAN CITY -Nakiddaw itay nabiit ti pannakailaksid dagiti agmulmula iti tabako mainaig iti panagbuis nangruna iti makunkuna nga expanded value added tax (E-VAT).

Daytoy ti sinaguday ti resolusion a pinutar ni Bise Gob. Deogracias Victor “DV” Savellano ken naidatag iti hunta probinsial babaen ken ni Bokal Alexander Bistoyong, chairman ti committee on agriculture, kabayatan ti regular session a naangay itay lawasna.

Kas naipalaon iti resolusion, naiturong ti nadakamat a kiddaw kada Presidente Gloria Macapagal-Arroyo, Senate President Franklin Drilon ken House Speaker Jose De Venecia.

Inkalintegan ni Savellano a rumbeng laeng a mailaksid iti E-VAT dagiti agmulmula iti tabako gapu iti kangina dagiti aramatenda nga agricultural inputs a kas iti ganagan ken pestisidio idinto ta saan met a nangina wenno nangato ti presio dagiti ilakoda a produkto kas iti tabako.

Iti met biang ni Bokal Orlino Tesoro, chairman ti committee on rules and legal matters, inkalinteganna nga awan ti umdas a rason a pangiputanan iti pannaka-exempt dagiti mannalon iti EVAT.

“Mapasamak laeng ti kasta no maamendaran dagiti sumagmamano a probision kas naituyang iti EVAT Law. Ngem agingga a di maamendaran, saan a maiyannatup iti linteg a maited ti tax exemption,” panangilawlawag ni Tesoro.

Naitantan pay laeng ti pannakataming ti nadakamat a resolusion gapu iti kaawan ti autor a mangdepensa iti daytoy kabayatan ti deliberasion.

Comments are closed.